PCIC Foti Ona CCTV iha Komandu PNTL Munisípiu Dili

Hatutan.com, (02 Setembru 2022), Díli-Policia Ciêntífica é de Investigação Criminal (PCIC), Sesta (02/09/2022), tuku 14:30 Otl,  foti ona kamera CCTV (Closed Circuit Television) iha sela detensaun Komandu Polísia Munisípiu Dili.

Lee Mós : Komandu PNTL Forma Ona Ekipa Hodi Investiga Kazu Mate Iha Sela Polísia Caicoli

Ekipa PCIC foti ona CCTV iha sela detensaun PNTL Munisípiu Dili, Sesta (02/09/2022). Foto/Hatutan.com

CCTV ne’e nu’udár evidénsia ida bá kazu ne’ebé iha relasaun ho José Bernardo nia mate iha sela detensaun PNTL Munisípiu Dili, Kinta kalan (01/09/2022).

Ekipa PCIC to’o iha Komandu Dili, iha tuku 14:30 to’o 15:52, Otl, hodi hala’o kedas koordenasaun estrutura Komandu PNTL Dili,  nune’e, bele fasilita ekipa PCIC atu rekolla objetu krime iha fatin akontesimentu.

Tuir observasaun Hatutan.com nian hatudu katak durante ekipa PCIC  dezliga no rekolla CCTV, maibé bainhira jornalista Hatutan.com atu hakbesik maibé membru komandu PNTL Dili balun la autoriza tanba regra investigasaun la admite atu jornalista atu partisipa iha situasaun sira sijilu ne’e

Hafoin enkontru koordenasaun ne’e, parte PCIC akompañadu hosi investigadór sira PNTL Dili nian, hodi tama direta bá sala detensaun ne’ebé suspeitu tara-aan bá, halo ezaminasaun iha lokál insidente, inklui dezliga no rekolla mós objetu balu hanesan CCTV, ne’ebé karik bele kapta buat ruma antes no depois suspeitu hakotu iis ho tara aan.

Hatutan.com tenta ona halo konfirmasaun ho Portavós PCIC, Octávio da Costa Araújo, hodi husu kona-bá kuantidade CCTV hira mak sira rekolla, maibé labele fó sai, tanba konsidera segredu justisa.

CCTV ne’ebé PCIC rekolla nu’udár evidénsia ka objetu sira krime nian, atu bele ajuda PCIC hodi kontinua prosesu inkéritu bá kazu ne’e, nune’e bele mós deskobre motivu ka kauza sira hosi José Bernardo nia mate.

Lee Mós : Kazu Mate iha Sela Polísia, Estrutura PSHT Apela bá Membru Sira Hakmatek

Jornalista: Rogério Pereira Cárceres