Autópsia Mate Isin José Bernardo, “Mamiik Nakfera” no “Ook Metan”

Hatutan.com, (05 Setembru 2022), Díli-Autópsia bá mate isin José Bernardo, hatudu katak matebian nia “mamiik nakfera”, “ook metan” no isin lolon balun bubu.

Lee Mós : Pájina Istória, Hahalok Polísia Hafo’er Reputasaun PNTL

Komandu Jerál PNTL delega membru sira bá fó sentidu lutu bá família matebian José Bernardo iha nia rezidensia iha Audian, Díli, Segunda (05/09/2022). Foto/Hatutan.com

Fontes informasaun sekreta bá Hatutan.com, Segunda (05/09/2022), informa katak rezultadu autópsia sai ona no entrega bá parte relevante sira, liuliu Ministériu Públiku  (MP) hodi halo investigasaun bá kazu matebian José Bernardo ne’ebé mate ho kondisaun tara ho fiu iha sela detensaun Polísia Nasionál Timor Leste (PNTL) Munisípiu Díli, Kinta kalan 01 fulan-Setembru 2022.

Hatutan.com mós tenta konfirma ho família sira, inklui mós parte relevante sira, liuliu Polísia Sientífika Investigasaun Kriminál (PCIC), maibé seidauk bele fó informasaun ruma kona-bá rezultadu autópsia bá mate isin José Bernardo tanba sei iha prosesu investigasaun no konsidera hanesan segredu justisa.

Tuir observasaun Hatutan.com nian iha mate uma, Segunda meiudia, membru Polísia sira hosi Komandu Jerál PNTL no Komandu Munisípiu Díli nian bá mate uma  hodi hato’o sentidu lutu (condolence) bá família matebian no halo diálogu  ho família matebian.

Lee Mós : PCIC Foti Ona CCTV iha Komandu PNTL Munisípiu Dili

Komandu Jerál PNTL Suspende Membru Na’in-ualu

Hosi sorin seluk Komandu Jerál PNTL foti ona sansaun dixiplinár hodi suspende ka hapara ona nia membru hamutuk na’in-ualu (8), relasiona ho  matebian José Bernardo (JB) nia mate iha sela detensaun Polísia, Caicoli, Díli.

Portavós Komandu Jerál PNTL, Superintendente Xefe Polísia, Armando Monteiro, hateten, iha Sesta, (02/09/2022) komandante jerál PNTL, Komisáriu Faustino da Costa, hasai ona despaxu urjente ida, ho númeru 365/CG-PNTL/IX/2022, hodi nomeia ofisiál PNTL na’in-haat (4), nune’e bele halo investigasaun internal urjente bá kazu ida ne’e.

“Ohin, dia 05 fulan-Setembru 2022, Komandu Jerál PNTL foti medida kauteláres, hodi fó suspensaun preventive durante loron 60 bá membru komandu PNTL Munisípiu Díli na’in-ualu (8), kompostu hosi ofisial na’in-tolu (3), Sarjentu na’in-ida (1), no Ajente na’in-haat (4), ne’ebé durante hala’o sira nia kna’ar no rezulta ita-nia sidadaun ho José Bernardo (21), mate iha sela detensaun, hodi submete ba prosesu investigasaun dixiplinár no kriminál nian,” Superintendente Xefe Polísia, Armando Monteiro, informa ba jornalista sira, liuhosi konferénsia imprensa iha Kuartél Jerál PNTL,  Caicoli, Díli.

Lee Mós : Komandu PNTL Forma Ona Ekipa Hodi Investiga Kazu Mate Iha Sela Polísia Caicoli

Matebian José Bernardo. Foto/Ilustrasaun

Portavós Armando Monteiro, esplika, medida suspensaun preventiva ne’ebé komandu PNTL foti bá membru na’in-ualu (8) ne’e, atu bele fó oportunidade bá nia membru sira ne’ebé mak hala’o sira-nia kna’ar, foku ka konsentrasaun de’it bá prosesu investigasaun internal ninian.

“PNTL iha regulamentu dixiplinár, sé enkuantu iha prosesu investigasaun internal ida-ne’e mak iha indísiu bá akontesimentu ida-ne’e mak liga bá krime ninian, sei responsabiliza ba aktu kriminalidade mós,” Armando Monteiro hateten.

Membru na’in-ualua ne’ebé hetan ona suspensaun hosi sira nia komandu  ho inisiál AS, MS, AQ (Ofisial), LS (Sarjentu), TW, FABA, AAM no TBCP (Ajente).

“Sira na’in-ualu ne’e labele hala’o sira nia kna’ar, ne’e direitu mós, hahú despaxu ida-ne’e sai, ordém ida ne’e sai, hanesan sidadaun baibain, no prosesu rua ne’ebé mak agora hein hela sira,” Armando afirma tan.

Portavós PNTL, Armando Monteiro, fundamenta katak, komandu nia desizaun hasoru membru nain-ualu (8) ne’e la’ós tanba iha ona indísiu katak sira mak envolve iha kazu ne’e, maibé, tanba vítima José Bernardo mate bainhira sira mós hala’o hela iha tempu ne’ebá.

“Prosesu investigasaun internal ida ne’e mak oras ida sei hatene. Tanba komandu foti desizaun ida ne’e, bazeia ba kna’ar ne’ebé mak sira hala’o, no to’o ikus ita-nia sidadaun sai vítima,” Komandante Monteiro, hateten. 

Lee Mós : Kazu Mate iha Sela Polísia, Estrutura PSHT Apela bá Membru Sira Hakmatek

Hosi akontesimentu kazu ida ne’e, iha kalan tuku 19:25 Otl, Komandante PNTL Komandu Munisípiu Dili, Superintendente Xefe Polisia, Henrique da Costa, ho nia estrutura tomak, halo reuniaun ho Xefe Servisu Investigasaun Kriminál Nasionál (SIKN), Superintendente Xefe Jorge Monteiro, ho nia ekipa, hamutuk ho Prokuradór Distritál Díli, Jacinto Babo, Defensór Públiku, adjuntu Provedór Direitu Umanu no Justisa (PDHJ), José Tello ho sosiedade sivíl no advogadu privadu  Pedro Aparicio.

Rezultadu hosi reuniaun ida ne’e, iha konkordánsia katak, presiza kria ekipa investigasaun konjunta external no internal PNTL nian ne’ebé mak hahú hala’o ona servisu iha kedas kalan akontesimentu ne’e.

Iha loron 02 fulan-Setembru 2022, tuku 08:30 Otl, Servisu Investigasaun Kriminál Nasionál-PNTL halo pedidu autópsia bá Ministériu Públiku, hodi hetan despaxu autópsia nian.

Bazeia ba konkordánsia reuniaun iha Komandu PNTL Munísipiu Dili, atu garante profisionál, transparante no akuntabilidade, maka iha tuku 14:00, Otl, SIKN ho médiku Patolójia hosi HNGV mak halo rekonstrusaun iha lokál krime nian.

Iha Sábadu (03/09/2022), médiku patolójia mak hala’o ona autópsia bá José Bernardo nia isin mate iha sala mortuáriu HNGV, Bidau, Dili. Enkuantu, rezultadu autópsia bá matebian ne’e José Bernardo ne’e rasik, parte HNGV entrega ona iha Ministériu Públiku.

Tuir planu, iha segunda, 05 fulan-setembru 2022 ne’e, maizumenus tuku 15:00, lokraik ne’e, família matebian sei lori matebain José Bernardo nian bá haloot iha semitériu públiku, Becusse.

Segundu Komandante Jerál PNTL, Komisáriu Polísia Mateus Fernandes, mós halo ona komunikasaun direta ho família matebian nian iha mate-uma, Audian, no sei fó garante seguransa bá iha serimónia funeral ne’e tomak.

Komandu PNTL mós husu nafatin bá timoroan hotu, no liu-liu públiku tomak, atu labele monu bá manobra ne’ebé lansa hosi indivíduu ka grupu balu ne’ebé mak lansa propaganda oioin iha média sosiál.

“Hamutuk ita kria pás, nafatin unidade, amizade, promove ita nia identidade no kultura nu’udár ema sidadaun timoroan, hodi kontribui ba estabilidade seguransa no dezenvolvimentu nasionál,” Armando Monteiro hateten.

Jornalista: Rogério Pereira Cárceres