Papa Francisco Husu Sua Eminénsia Virgílio Kardeál Tau-matan ba Sarani TL

Hatutan.com, (05 Setembru 2022), Díli—Papa Francisco husu ba sua Eminénsia Dom Virgílio Kardeál do Carmo da Silva, SDB atu kontinua lori nia misaun Santu nu’udár saseluk Kristu nian hodi tau-matan ba povu Maromak nian iha Timor Leste (TL) ne’ebé Nai saran ona ba nia futar liman Santa.

Sarani sira halo serimónia bemvido ba Sua Eminência Dom Virgílio Kardeál do Carmo da Silva, SDB iha Aeroportu Comoro, hafoin fila hosi Vatikanu, Segunda (05/09/2022). Foto Hatutan.com.

“Amu Papa hameno de’it atu ha’u kontinua tau-matan didi’ak ba ha’u nia sarani no povu,” Sua Eminénsia Dom Virgílio Cardeál do Carmo da Silva, SDB hateten ba jornalista sira iha Aeroportu Internasionál Nicolau Lobato, Comoro, Segunda (05/09/2022).

Lee Mós:Títulu Kardeál Hanesan Priviléjiu ba Igreja TL

Papa Francisco nia mensajen ba Igreja universál barak loos no Dom Virgílio Kardéal kontente teb-tebes haree komunidade Timoroan barak mak partisipa iha serimónia solene investidura Kardinalísiu nian.

Ho prezensa na’i ulun hosi parte Estadu no Governu TL nian no peregrinu sira hosi rai laran no mós liur halo Papa Francisco kontente no hameno de’it liafuan badak atu kontinua servi Uma Kreda partikulár iha Timor Leste no mós Igreja universál.

Kona-bá dokumentu Fraternidade Umana ne’ebé Timor Leste adopta ona ba kurrikulu nasionál liu hosi rezolusaun Parlamentu Nasional númeru 93/V(4ª), Kardeál ne’e hatutan, durante iha Vatikanu la halo tratamentu espesífiku ho Amu Papa Francisco kona-bá dokumentu ne’e maibé kontinuasaun ba dokumentu ne’e, vise-Primeiru Ministru Vatikanu sei mai Timor Leste iha semana rua tán atu halo semináriu internasionál ida kona-bá dokumentu fraternidade umana ne’e iha Univesidade Katólika São João Paulo II, Balide Díli.

Sei iha mós lansamentu ba Dokumentu Fraternidade Humana iha Timor Leste, hodi hatudu pasu konkretu sira ne’ebé Estadu no Governu inklui Parlamentu Nasionál hatudu.

“Ida ne’e atu ita hatudu katak Amu Papa Francisco nia domin fó mai ita no ita mós hatudu ho jestu konkretu oinsa kolabora no implementa dokumentu sira ne’ebé Amu Papa fó ba ita,” nia subliña.

Tuir observasaun jornalista Hatutan.com iha terrenu katak, sarani sira ho ksolok forma hosi aeroportu to’o iha Igreja parókia Imaculada da Conceição Katedrál, Villa Verde Díli hodi simu Kardeál dahuluk Timoroan ne’ebé foin simu nia investidura hosi Papa Francisco iha Vatikanu.

Jornalista: Vito Salvadór