Defeza & Seguransa
Lei Bandu Membru GAM-GAR Hatais Atributu Iha Fatin Públiku
Hatutan.com, (07 Setembru 2022), Díli—Maski Governu liuhosi Sekretária Estadu Juventude no Desportu (SEJD) reativa ona atividade Grupu Arte Marsiál (GAM) ho Grupu Rituál (GAR) sira, maibé iha lei númeru 05/2017 bandu membru sira atu hatais atributu hodi ‘la’o pasiar’ iha fatin públiku.
Farda Arte Marsial ne’ebé UPF-SNI halo apreensaun iha Fronteira tanba sidadaun sira hatama illegal iha Kuarta (13/07/2022). Foto/PNTL.
“Utilizasaun farda la tuir regra, ne’e konsidera infrasaun no sei kona sansaun. Iha Segunda diretiva KRAM, kompletu loos iha ne’ebá no ami esplika detallu liu. Iha lei númeru 05/2017, artigu 28 kona-bá ordenasaun mós, esplika loloos iha ne’ebá,” Prezidente Komisaun Reguladora ba Arte Marsiál (KRAM), Octávio da Conceição, esplika hafoin enkontru koordenasaun servisu iha Ministériu Interiór (MI), Vila Verde, Díli, Kuarta (07/09/2022).
Lee Mós:Governu Sei Notifika Líder GAM-GAR Responsabiliza Aktu Krime
Durante tinan ida resin, KRAM ho esforsu tomak hodi disemina de’it Segunda Diretiva KRAM nian, iha territóriu tomak no kuaze iha munisipiu hotu-hotu, situasaun la’o hakmatek, iha Kapitál Díli mak mosu fali problema.
Iha matadalan lima ne’ebé hatuur iha segunda diretiva. Matadalan primeiru maka, resenseamentu membrus organizasaun arte marsiais tanba tinan barak, ema la hetene katak, arte marsiál ne’e membru ne’e hira.
Maibé prosesu hosi resensiamentu mak foin hatene katak, kada organizasaun arte marsiál sira iha membru hira. Ida fali maka husu atu treinadór sira iha kapasidade, iha sertifikasaun hosi sira nia organizasaun.
Seidauk Iha Lei Espesífiku ba GAR
Maski lei atu regula atividade GAM sira nian iha ona, maibé KRAM seidauk halo lei espesífiku ba atividade GAR nian.
Iha lei númeru 05/2017, seidauk iha artigu ida ne’ebé espesifíka liu, hodi kontrola grupu arte rituál sira nia atividade.
“Tanba ne’e, governu ho KRAM iha hela prosesu estudu ida oinsá atu halo lei ida ba arte rituál, depois de arte marsiál sira regula hotu ona no tuir mai sei regula mós arte rituál sira, tuir lei. Sei halo lei, lei própria ida ba arte rituál. Sé hakarak hamosu esbosu lei ida arte rituál, presiza iha estudu ida, presiza iha peskiza ida hodi hatene natureza loloos hosi arte rituál,” Octávio da Conceição, hateten.
Jornalista: Rogério Pereira Cárceres