Horta Konsidera Prosesamentu Gáz Natural Nu’udár Asuntu Kompleksu

Hatutan.com, (10 Setembru 2022), Díli–Prezidente Republika (PR), José Ramos-Horta, rekoñese prosesamentu gáz natural liquifeitu – GNL nu’udár assuntu komplexu, maske iha retornu bo’ot hosi investimentu ne’e.

Lee Mós : Outubru, Mina iha Bayu Undang Hahú Maran no ANPM Sei Transforma Bá Projetu CCS

PR Ramos-Horta vizita instalasaun Gáz Natural Liquifeitu – GNL iha Darwin, Austrália, Sábadu (10/09/2022). Foto/Media PR

Xefe Estadu hato’o asuntu ne’e baihira vizita instalasaun Gáz Natural Liquifeitu – GNL iha Darwin, ne’ebé mak jere dezde tinan 2006 hosi empreza Santos hodi prosesa gáz hosi kampu Bayu Undang.

“Iha ne’e mak simu gáz hosi Bayu Undang iha tinan hirak ne’e nia laran, iha fatin ida-ne’e iha altu nivel teb-tebes, mak depoiz halo liquifeitu, tamba gáz ne’e ho volume bo’ot teb-tebes, entaun tenke kondensa, liuhosi mákina sira ne’e hotu, delikadu teb-tebes, alta teknolojia, depoiz ho ró-ahi bá Japaun no osan tama Timor-Leste” Xefe Estadu hateten iha komunikadu imprensa ne’ebé Hatutan.com sita tuir.

Tuir Xefe Estadu, reseita petrolífera mak finansia seitor infraestrutura, edukasaun, sosiál no seluk tan iha Timor-Leste.

“Investimentu bo’ot ho teknolojia, fó perigu, risku oi-oin, ho ema matenek ne’ebé halo buat sira ne’e, ita simu osan, iha depoiz osan sira ne’e ita uza hodi investe buat lubuk, ita nia Estrada ba Díli, ba Lospalos, ba Baucau, ba Same, eletrefikasaun, bolsa estudu, ba ema ho difisiénsia, veteranu sira, ba faluk sira ne’e mai husi ne’e” subliña Xefe Estadu.

Relasiona ho produsaun Bayu Undang ne’ebé mak sei remata iha tempu besik, empreza Santos sei lori ba Portu Tibar, ró-ahi ne’ebé hanesan estrutura armajenamentu offshore no halo dezmantelamentu.

“Agora dadaun Bayu Undang atu maran ona no Santos atu monta ekipamentu balun iha Portu Tibar, para fase ekipamentu sira ne’e no fatin ne’e sai bo’ot teb-tebes ba kapturasaun karbonu ne’ebé mak bo’ot liu iha Azia no mós iha mundu” Xefe Estadu tenik.

Vizita Xefe Estadu bá Austrália mós ko’alia kona-bá dezenvolvimentu Greater Sun Rise ne’ebé durante ne’e paradu, tamba pozisaun polítika ne’ebé la hanesan no Austrália hakarak dada Gaz Natural Liquifeitu ba Darwin, enkuantu Timor-Leste hakarak dada gazodutu bá Beasu.

Greater Sun Rise lokaliza kilometru 150 husi Kosta Sul Timor-Leste no Kilometru 450 bá Darwin, Austrália.

Jornalista : Vito Salvador