Horta Prontu Apoiu Governu Buka Solusaun Lori Ró Haksolok Mai Timor

Hatutan.com, (14 Setembru 2022), Díli- Prezidente Repúblika (PR), José Ramos-Horta, prontu tulun Governu buka solusaun atu lori Ró Haksolok mai Timor-Leste.

Lee Mós : Alkatiri: Problema Hotu Kona-bá Ró Haksolok Rezolvidu

Prezidente Autoridade RAEOA Mari Alkatiri, tempu ne’ebá akompaña hosi Bispu Eméritu Dom Carlos Filipe Ximenes Belo, SDB ho Madre Guilhermina Marçal FdCC, hala’o lansamentu ba ró Haksolok iha Portugál, Sesta (26/05/2017). Foto/Dok. ISQ.

Xefe Estadu  hateten, nia sempre prontu apoiu Governu, atu buka solusaun bá Ró Haksolok, la’ós agora de’it, uluk antes eleitu bá Prezidente Repúblika, buat ne’ebé Governu presiza, nia hosi kotuk ajuda Governu.

“Ha’u la hatene, se iha problema ruma ho Ró Haksolok ne’ebé Governu presiza ha’u nia ajuda, se presiza, ha’u disponivel ajuda,” José Ramos-Horta hateten bá jornalista sira iha edifísiu JSMP, Díli, Kuarta (14/09/2022).

Prezidente Autoridade Rejiaun Espesial Oé-Cusse Ambeno (RAEOA) Arsénio Bano rasik konfirma ona katak iha loron 16 ka loron 17 fulan-Setembru ne’e, nia ho nia delegasaun sei dezloka bá Portugal hodi halo servisu no haree ró Haksolok ne’ebé Estadu gasta ona osan millaun $14 liu.

Arsénio Bano hateten, atividade atu halo iha ne’ebá mak fokus liubá estaleiru ho Ró Haksolok iha enkontru ho poténsia investimentu ho universidade sira.

Ró Haksolok ho kustu millaun U$14 liu ne’e inaugura iha loron 26 fulan-Maiu 2017 iha sidade Figueira da Foz Portugal no tuir informasaun sei to’o Timor-Leste iha Outubru 2017, maibé tanba problema internal husi empreza Atlantic Eagle Ship Building ho subkontraktor maka to’o agora ró seidauk mai. Ró ne’e rasik iha kapasidade atu tula ema na’in-377 no karreta hamutuk 15.

Prosesu konstrusaun Ró Haksolok ninia kontratu asina iha tinan 2014 entre Governu no empreza portugés. Konstrusaun ró ne’e konsege paradu maibé bainhira estabelese Zona Espesiál Ekonomia Sosial Merkadu (ZEESM), prosesu konstrusaun ró ahi ne’e entrega bá ZEESM mak responsabiliza.

Lee Mós : CAC Seidauk Hetan Delegasaun Investiga Kazu Ró Haksolok

Jornalista: Vito Salvadór