Xanana Partisipa Simeira Internasionál Kona-bá Edukasaun Iha ONU

Hatutan.com, (14 Setembru 2022), Díli— Prezidente Repúblika (PR), José Ramos-Horta delega Líder Nasionál Kay Rala Xanana Gusmão hodi reprezenta Estadu Timor-Leste (TL) bá Simeira Internasionál kona-bá Edukasaun ne’ebé sei hala’o iha Organizasaun Nasaun Unidas (ONU) iha loron 19 fulan Setembru tinan ne’e.

Prezidente Repúblika (PR), José Ramos-Horta despede Líder Nasionál Kay Rala Xanana Gusmão iha Aeroportu Internasionál Nicolau Lobato Comoro, hodi reprezenta Xefe Estadu ba Simeira Internasionál Edukasaun iha ONU, Kuarta (14/09/2022). Foto/Média PR.

Simeira Mundiál kona-bá Edukasaun ne’e sei partisipa hosi Xefe Estadu no Ministru Negósiu Estranjeiru hosi nasaun oi-oin.

Lee Mós: Xanana Halo Enkontru Oras-rua ho Xefe Asuntu Polítika no Ekonomia Embaixada EUA

“Maun Boot Xanana bá simeira ida importante. Simeira kona-bá edukasaun iha loron 19 iha ONU, tanba ha’u iha kompromísiu iha ne’e, ha’u husu ba Maun Xanana atu bele reprezenta Estadu Timor-Leste, reprezenta Prezidente-da-Repúblika,” Hatutan.com sita deklarasaun Prezidente Repúblika, José Ramos-Horta iha komunikadu.

Kay Rala Xanana Gusmão sei atende resepsaun iha loron 20 fulan Setembru ho Prezidente Estadus Unidus Amérika, Joe Biden.

Hafoin Simeira Mundiál Edukasaun iha Nasoens Unidas, Kay Rala Xanana Gusmão akompaña hosi Ministra Negósiu Estranjeiru sei dezloka bá Portugál hodi atende enkontru balun iha Lisboa.

Xanana Gusmão dezloka ba rai liur ho aviaun Citilink iha Kuarta 14 Setembru no sei fila hikas mai Timor-Leste iha loron 5 fulan Outubru tinan ne’e.

Jornalista: Vito Salvadór