Hatutan.com, (15 Setembru 2022), Díli–Ministru Finansas, Rui Augusto Gomes, Kuarta horiseik (14/09/2022), aprezenta bá Konsellu Ministrus no hetan ona aprovasaun bá Projetu Proposta Lei Orsamentu Jerál Estadu (OJE) tinan 2023 ho montante totál billiaun $3,1.
Orsamentu Seguransa Sosiál hetan alokasaun millaun $235,7 no RAEOA millaun $120. Montante despesa globál iha PPL OJE 2023 hanesan mós ho montante despesa globál iha Lei das Grandes Opções do Plano 2023 ne’ebé mak Prezidente Repúblika, José Ramos-Horta promulga ona iha fulan-juñu liubá.
Proposta OJE 2023 ne’e sei uza hodi finansia Programa 49 ho medidas prinsipál 275, organizadu iha área estratéjiku 16 ne’ebé Governu sei foku ba iha tinan oin: Agrikultura, Pekuária, Peskas no Floresta; Ekonomia no Empregu; Turizmu; Dezenvolvimentu Rural no Abitasaun; Ambiente; Petróleu no Minerál; Eletrisidade no Enerjia Renovável; Konektividade Nasionál; Bee no Saneamentu; Edukasaun no Formasaun; Saúde; Inkluzaun no protesaun Sosiál; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.
Iha Proposta OJE 2023, Governu mós propoin ba Parlamentu Nasionál orsamentu ba Programa Nutrisaun ho montante millaun $10. Ida-ne’e reprezenta aumentu 𝑞𝑢𝑎𝑡𝑟𝑜 𝑣𝑒𝑧𝑒𝑠 ka porsentu atus-haat (400%) kompara ho orsamentu alokadu ba programa Nutrisaun iha OJE 2022.
Bá oin, Governu ofisialmente sei entrega PPL OJE 2023 ba Parlamentu Nasionál iha loron 3 fulan-outubru atu diskute no aprova iha fulan-novembru nia laran molok haruka ba Prezidente Repúblika atu tetu iha tinan ida-ne’e nia rohan.
Kalendáriu ne’e tuir ona espíritu Lei Foun Enkuadramentu Orsamentál ne’ebé mak promulga husi Prezidente Repúblika, Francisco Guterres Lu Olo iha fulan-Fevereiru liubá. Lei estruturante ne’ebé sai nu’udar baze ida ba Reforma Jestaun Finanseira Públikas iha Timor-Leste – konkista importante ida ne’ebé mak Oitavu Governu Konstitusionál lideradu hosi Primeiru-Ministru, Taur Matan Ruak halo durante nia mandatu.