Desportu
Taxa AFAMA no Femenina F-FDTL Hakarak Anima Juventude ho Futsál
Hatutan.com, (19 Setembru 2022), Díli— Ami Família Militár Asuwain (AFAMA) hamutuk ho ekipa Femenina FALINTIL Forsa Defeza Timor-Leste (F-FDTL) lansa ona eventu kompetisaun jogu futeból salaun (Futsál) periudu 2022 entre mane ho feto, iha segunda (19/09/2022).
Prezidente AFAMA, Rosa Maria Quintão.
Eventu desportiva hakarak anima juventude timoroan sira ne’ebé iha talentu kona-bá bola liu-liu iha modalidade futsal oinsá bele lori sira nia klubu, hakbesik bá komisaun organizadóra hodi rejísta, nune’e bele partisipa iha kompetisaun ne’e.
Lee Mós: Membru F-FDTL Na’in-40 Kontribui Ran ba HNGV
Prezidente AFAMA, Rosa Maria Quintão haktuir katak AFAMA harii iha 24 Abril 2013 maibé la integra ba iha instituisaun F-FDTL.
Maski nune’e sira iha relasaun emosionál ho instituisaun armada ne’e, tanba sira nia kaben, hola parte iha instituisaun hanesan membru F-FDTL, hahú hosi postu Soldadu, Ofisiais, Jenerais no Tenente Jenerál ne’ebé durante ne’e sempre servisu hamutuk.
“Ami hakarak oferese eventu ida ne’e atu bele anima joven sira. Durante ne’e, ami nia organizasaun ida ne’e hala’o ona eventu lubuk ida entre ami de’it. Tanba ne’e maka ami hakarak hatudu ba públiku,” Rosa Maria Quintão hateten iha sentru Fundasaun Falur Rate Laek, Colmera.
AFAMA vizibilza aan iha sosiedade nia leet, liu-liu iha públiku hamutuk ho ekipa Femenina F-FDTL, hodi realiza eventu ida-ne’e, oinsá atrai ka dada joventude talentózu sira, nune’e mós juventude seluk atu bele hadomi bola iha sira nia vida.
Ami Família Militár Asuwain (AFAMA) hamutuk ho ekipa Femenina FALINTIL Forsa Defeza Timor-Leste (F-FDTL) hala’o konferensia imprensa hosi lansa kompetisaun jogu futeból salaun (Futsál) periudu 2022 entre mane ho feto, iha Segunda (19/09/2022).
Diresaun Nasional bá Jéneru F-FDTL, Tenante Marquita da Cunha husu bá juventude timoroan tomak atu rejista sira ninia klubu, nune’e bele partisipa iha kompetisaun refere, tanba jogu desportiva ho modalidade Futsál ne’e sira anúnsia ka lansa ona.
La’ós ne’e de’it, AFAMA ho Femenina F-FDTL husu mós bá funsionáriu sira liña ministériu sira hotu ne’ebé interese, atu bele forma sira ninia ekipa ka klubu rasik hodi partisipa.
Iha fatin hanesan, Prezidente Komisaun Organizadora, Dinis António informa, tuir planu komisaun organizadóra sei simu klubu 64, ne’ebé mak sei fahe bá ekipa femenina 32 no ekipa maskulinu klubu 32.
Sistema ne’ebé aplika iha lala’ok jogu Futsál ne’e, hala’o iha faze tolu. Dahuluk, halo apuramentu, daruak, aplika no datoluk, semi-final no finál.
Kada klubu ne’ebé atu rejista tenke ho hatama $100 ne’ebé fahe ba inskrisaun $50 no $50 sai hanesan garantia ida bainhira mosu failansu tékniku ruma durante jogu ne’e bele rezolve.
Jornalista: Rogério Pereira Cárceres