“Órgaun no servisu administrasaun públika sira-hotu, ne’ebé dependente iha Governu, tenke promove atividade fízika hosi parte funsionáriu sira ne’ebé integra iha órgaun no servisu hirak ne’e, hodi estabelese períodu tempu ne’ebé loloos, la liu oras ida, iha loron Sesta, entre oras tuku 16:30 no tuku 17:30. Períodu tempu ne’e sei bele hamenus ka sei la hala’o bainhira iha justifikasaun ho razaun interese públiku, liuliu atu asegura funsionamentu regulár órgaun no servisu administrasaun públika nian,” Hatutan.com sita komunikadu.
Advertisement
Governu apela mós ba organizasaun no sosiedade sivíl no ba empreza sira setór privadu nian atu hamutuk no promove prátika atividade fízika ho ninia kolaboradór no traballadór sira durante pelumenus oras iha semana ida.
Atividade fízika ne’e sei la hala’o iha semana ikus fulan nian, atu garante organizasaun no ezekusaun asaun koletiva ba limpeza jerál hosi aglomeradu populasaun ne’ebé eziste iha territóriu nasionál ne’ebé antes ne’e prevee ona.