Desportu
F-FDTL Sei Realiza Taxa Komandante Nicolau Lobato
Hatutan.com, (10 Outubru 2022), Díli—FALINTIL-Forsa Defeza Timor-Leste (F-FDTL) Sentru de Instrusaun Komandante Nicolau Lobato Metinaro, sei realiza taxa komandante Nicolau Lobato hodi komemora loron ezisténsia sentru instrusaun ne’e ba dala-XXII.
Komisaun organizadora ba taxa Komandante Nicolau Lobato, lidera hosi Tenente Marcelo de Araújo realiza konferénsia imprensa iha Xanana Sport Center, Bairru dos Grilhos, Segunda (10/10/2022).
“Komisaun organizadora ba taxa Komandante Nicolau Lobato hakarak informa ba públiku liu-liu ba klubu futeból sira ne’ebé iha interese atu partisipa iha jogu ne’e katak, hahú ohin to’o loron 21 fulan ne’e hahú simu rejistrasaun ba klubu sira no fatin iha edifísiu Federasaun Futeból Timor-Leste,” Tenente Marcelo de Araújo hateten iha Xanana Sport Center, Bairru dos Grilhos, Segunda, (10/10/2022).
Lee Mós:ATR-TL Realiza Konkursu Múzika Atu Promove Fraternidade Umana
Torneiu ne’ebé sei organiza hosi sentru instrusaun F-FDTL ne’e ho objetivu atu dignifika no valoriza nafatin erói no komandante Nicolau Lobato.
Komisaun organizadora disponibiliza de’it klube 32, tanba ne’e ba klubu sira ne’ebé rejistu tarde komisaun organizadora sei la simu.
Torneiu ne’e sei abertura iha 20 de Novembru tinan ne’e, no sei remata iha 19 Fevereiru 2023.
Ba klubu sira ne’ebé hakarak partisipa sei rejista ho osan rejistu $150 no prémiu ba manán na’in dahuluk sei simu taxa rotativa no taxa permanente ba klubu inklui osan $1200 ba manán na’in daruak sei simu taxa no osan $1000, ikus liu ba manán na’in datoluk sei simu taxa ho osan $800.
Ba informasaun kompletu kona-bá eventu desportivu ne’e, klubu sira bele ba halo konfirmasaun ho komisaun organizadora iha sede FFTL.
Jornalista: Vito Salvadór