Hatutan.com, (14 Outubru 2022), Díli- Sekretariu Jerál partidu FRETILIN, Marí Bin Amude Alkatiri, sei la halo interferénsia polítika bá iha kazu osan $130,000 ne’ebé ikus mai hamosu polémika membru Governu na’in-rua hosi partidu KHUNTO halo intervensaun bá Servisu Nasionál Intelijénsia (SNI) nian.
Sekretariu Jerál partidu FRETILIN, Marí Bin Amude Alkatiri. Foto/Elio dos Santos da Costa
Sekretáriu Jerál Partidu FRETILIN, Marí Bin Amude Alkatiri bá jornalista sira iha Aeroportu Internasionál Nicolau Lobato, Sesta (14/10/2022), hateten kazu osan $130,000 ne’ebé atu lori bá li’ur maibé hetan apreensaun hosi autoridade polisiál, nia parte lakohi fó komentáriu no konsidera sé kazu ne’e bá ona justisa nia la ko’alia, husik justisa servisu, husik polísia sira halo investigasaun no Tribunál ho Ministériu Públiku halo servisu.
“Há’u la halo interferénsia polítika bá ida-ne’e,” Marí Bin Amude Alkatiri hateten. Nune’e, relasiona ho interferensia membru Governu na’in-rua; Vise-Ministru Justisa, José Edmundo Caetano ho Vise-Ministru Interior, António Armindo hosi partidu KHUNTO bá iha servisu SNI, Alkatiri dehan, ne’e kompetensia Primeiru-Ministru nian no Xefe Governu mak tenke ko’alia.
Advertisement
“Ne’e husu bá Primeiru-Ministru, se membru governu mak interven Primeiru-Ministru mak tenke hatán,” eis Primeiru-Ministru ne’e afirma tan.