Kazu Instalasaun Set-Top Box RTTL,E.P, CAC Halo Buska no Apreensaun iha Gabinete MAPKOMS, FFTL ho Rezidénsia Likisá

Hatutan.com, (17 Outubru 2022), Díli—Comissão Anti Corrupção (CAC), liuhosi ekipa Medida Prevensaun no Kombate Korrupsaun, Segunda 17 Outubru 2022, halo tán buska no apreensaun bá dokumentu iha gabinete Ministru Assuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, hodi hakle’an investigasaun ba kazu instalasaun Set-top Box RTTL,E.P.

CAC liuhosi ekipa Medida Prevensaun no Kombate Korrupsaun, halo tán buska no apreensaun bá dokumentu iha gabinete Ministru Assuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, hodi hakle’an investigasaun ba kazu instalasaun Set-top Box RTTL,E.P, Segunda (17/10/2022). Foto Hatutan.com/Elio dos Santos da Costa.

Bainhira to’o iha Palásiu Governu ekipa CAC nian diretamente tama ba gabinete MAPKOMS hodi halo esplikasaun kona-bá razaun sira nia prezensa iha gabinete ne’e.

Lee Mós: Kazu Instalasaun Set-Top Box RTTL,E.P, TDD Aplika Medida Aprezentasaun Periódika no Proibisaun Auzénsia bá Arguidu Sira

Investigaór CAC ne’ebé lidera buska no apreensaun ne’e halo tiha esplikasaun ba sira nia prezensa kontinua halo servisu hodi rekolla evidénsia sira liuliu ba dokumentu sira ne’ebé iha relasaun ho instalasaun Set-Top Box RTTL,E.P.

Ekipa CAC ne’ebé akompaña hosi Polísia Servisu Investigasaun Kriminál Nasionál halo mós identifikasaun ba Ministru Francisco Jerónimo, hodi halo apreensaun ba dokumentu box rua inklui komputadór ida ho marka Imec.

Hafoin halo aprensaun iha gabinete MAPKOMS, CAC tula mós Ministru ne’e ba iha nia servisu fatin ka gabinete Federasaun Futeból Timor Leste (FFTL), hodi halo mós apreensaun ba dokumentu importante balun.

Remata hosi FFTL, ekipa CAC kontinua ho Ministru ne’e bá iha nia rezidénsia iha Likisá hodi kontinua halo apreensaun ba dokumentu sira ne’ebé iha relasaun ho kazu instalasaun Set-Top Box RTTL,E.P.

Antes ne’e,  bazeia ba mandadu buska no apreensaun ho detensaun hosi Tribunál, Komisaun CAC liu hosi ekipa medida prevensaun no kombate korrupsaun, Kuarta (12/10/2022), detein no alzema (borgol) Asesór MAPKOMS ho inisiál GDS inklui na’in ba kompañia DILI ETERNAL INNOVATION INFORMATIO Lda ho inisiál MCS relasiona ho kazu instalasaun Set-Top Box RTTL,E.P.

Iha prosesu primeiru interrogatóriu iha Tribunál Distritál Díli,  Ministeriu Publiku iha nia alegasaun,  husu Tribunál atu aplika medida prizaun preventiva ba Asesór MAPKOMS ne’e no na’in Empreza ho inisiál MCS.

Alegasaun ne’e,  MP konsidera iha indisius forte, tanba ne’e husu Tribunál atu aplika medida prizaun preventiva, hodi asegura parte sira ba investigasaun.

Enkuantu hosi parte defeza,  husu Tribunál atu aplika medida ne’ebé justu, tanba parte sira kolabora ho justisa.

Primeiru interrogatóriu ne’e  taka bá publiku, maibé MP promove arguidu na’in-rua ho krime lima,  mak hanesan abuzu podér, brankamentu kapitál, fraúde fiskál, partisipasaun ekonomia negósiu,  no konflitu bá interese.

TDD liu hosi despaixu ikus, aplika medida aprezentasaun periódika no medida proibisaun auzénsia ba arguidu sira.

Jornalista : Vito Salvadór