Polítika
Tama ASEAN, Sei Lori Vantazen Ekonómiku bá TL
Hatutan.com, (12 Novembru 2022), Díli—Prezidente Repúblika (PR), José Ramos-Horta konsidera aseitasaun hosi nasaun membru Association of Southeast Asian Nations (ASEAN) atu simu Timor Leste (TL) nia adezaun, sei lori benefísiu boot ba ekonomia país ne’e iha futuru.
Sekretáriu Jerál ASEAN, Lim Jock Hoi hala’o reuniaun ho Prezidente Repúblika, José Ramos-Horta iha sekretariadu ASEAN Jakarta, Kuarta (20/07/2022). Foto/Hatutan.com.
Ramos-Horta hateten asuntu ne’e iha ámbitu komemorasaun loron juventude nasionál no Msakre Santa Cruz 12 Novembru, ba dala-XXXI, iha resintu semitériu Santa Cruz, Sábadu (12/11/2022).
Lee Mós: BREAKING NEWS: ASEAN Simu Timor-Leste Hanesan Membru Bá Dala-11
Xefe Estadu konsidera notísia di’ak ne’ebé Timor Leste simu iha Sesta (11/11/2022) atu tama ASEAN, ne’e ninia prosesu hahú kedan iha fulan Juñu 1974, bainhira Ramos-Horta bá Jakarta Indonézia hasoru-malu ho Eis Vise Prezidente Indonézia nian Adam Malik ko’alia ho nia iha momentu ne’ebá, esplika ba nia katak, Timor nia mehi hakarak hetan independénsia no kontinua hakarak tama ASEAN iha futuru.
“Jornada ne’e naruk tebe-tebes. Ha’u simu informasaun, ASEAN prontu simu Timor Leste. Signifika, ita nia ekonomia bele haksoit ba oin maka’as. Maibé, primeiru dame no laiha violénsia, segundu estuda,” Ramos-Horta hateten.
Antes ne’e, Estadu Timor Leste liu hosi VIII Governu Konstitusionál hato’o ona deklarasaun offisiál liu hosi konunikadu ba imprensa ne’ebé Hatutan.com asesu iha loron, Sesta (11/11/2022) katak, Timor-Leste hato’o boas-vindas ba deklarasaun lideransa ASEAN nian kona-bá aplikasaun Timor-Leste nian ba adezaun ba ASEAN atu admite Timor-Leste nu’udár membru bá dala-XI no espera atu servisu hamutuk ho Prezidénsia foun, Repúblika Indonézia.
“Ami haksolok tebes atu kolabora no servisu hamutuk ho Konsellu Koordenadora ASEAN no Sekretariadu ASEAN nian bá preparasaun Roteiru no bá adezaun tomak Timor-Leste nian inklui marka sira ne’ebé identifika ona iha relatóriu misaun sira ho Fact-Finding nian,” komunikadu ne’e haktuir.
Timor Leste mós kontinua husu ba Estadu membru sira ASEAN nian atu fó apoiu tomak ba Timor-Leste iha tinan 2023 hafoin halo preparasaun no adezaun ba Roteiru no relatóriu ba Simeira ASEAN ba dala 42.
Timor Leste rekoñese no agradese asisténsia kontinua no apoiu tomak hosi Estadu membru sira ASEAN nian, liu-liu ba Reinu Kamboja nian ba apoiu no TL nia apresiasaun ba parseiru esternu sira hodi fornese sira-nia kapasitasaun.
Lee Mós:ASEAN Simu Ona Submisaun TL, Ramos-Horta ho Órgaun Soberania Sira Prepara Pré-deklarasaun
Jornalista: Vito Salvadór