Orsamentu 2023 bá F-FDTL ho PNTL Pasa Unanimidade Iha PN

Hatutan.com, (15 Novembru 2022), Díli—Parlamentu Nasionál (PN), liuhosi votasaun espesiálidade, iha Tersa 15 novembru 2022, fó votu unanimidade bá orsamentu ne’ebé mak alokadu bá instituisaun FALINTIL Forsa Defeza Timor-Leste (F-FDTL) ho Polisia Nasionál Timor-Leste, iha Orsamentu Jerál Estadu (OJE) tinan 2023.

F-FDTL ho UPF hala’o patrulla konjunta iha área fronteira terrestra TL-RI. Foto/kontribuidór Eugénio Pereira.

Tuir dotasaun inisiál ne’ebé mak alokadu FALINTIL Forsa Defeza Timor-leste (F-FDTL), hamutuk  $33.022.685.

Orsamentu ida-ne’e, sei aloka bá programa defeza nasionál ho  $14.960.829. Programa boa governasaun no jestaun institusionál ho  $18.031.856. Programa Igualidade Jéneru no Inkluzaun Sosial ho rihun $30.

“Votu Afavór 60, kontra 0, no abstensaun 1. Nune’e, orsamentu bá Falintil Forsa Defeza Timor-Leste, pasa,” Prezidente Parlamentu Nasionál (PPN), Aniceto Guterres, deklara rezultadu votasaun espesiálidade iha plenária PN, Tersa (15/11/2022).

Enkuantu, dotasaun inisiál hosi orsamentu ne’ebé mak aloka bá PNTL, ho montante $.43.082.642.

Orsamentu ida ne’e, sei fahe bá Programa Seguransa Nasionál ho $38.348.854. Programa Boa Governasaun no Jestaun Institusionál ho $4.713.788. Programa Igualidade Jéneru no Inkluzaun Sosial ho rihun $20.

“Rezultadu votasaun, ho votu afavór 60, kontra 0, abstensaun 0. Orsamentu bá PNTL, pasa iha espesiálidade,” Aniceto Guterres, deklara tán.

Jornalista: Rogério Pereira Cárceres