Governu Tau $500.000 bá Serimónia Komemorasaun Loron Proklamasaun Independénsia

Hatutan.com, (17 Novembru 2022), Díli—Governu liu hosi Ministériu Administrasaun Estatál  (MAE) tau $500.000 bá komemorasaun loron proklamasaun indepedénsia 28 Novembru ba dala-XLVII.

Prezidente Komisaun (KO) Organizadora komemorasaun loron proklamasaun independénsia, atuál Ministru Administrasaun Estatal (MAE), Miguel Pereira de Carvalho atualiza preparasaun ba Xefe Estadu iha Palásiu Prezidensiál Nicolau Lobato Bairru-Pité, Kinta (17/11/2022).

Komemorasaun tinan ida ne’e, Governu hili tema “Mai Ita Hamutuk Kontinua Luta Ba Povu Nia Moris Di’ak”.

Lee Mós: Governu Tau $100,000 Hodi Komemora Loron Nasionál Juventude no Masakre Santa Krús

Prezidente Komisaun (KO) Organizadora atuál Ministru Administrasaun Estatal (MAE), Miguel Pereira de Carvalho atualiza ba Prezidente Repúblika, José Ramos-Horta kona-bá preparativu sira iha munisípiu Manatutu ao mezmu tempu konvida mós Xefe Estadu.

Atividade prinsipál ne’ebé komisaun organizadora prepara ona mak hanesan feirra iha ne’ebé sei halibur hamutuk atividade komersiál sira hosi Ministériu hotu-hotu.

Sei realiza misa agradesimentu iha Igreja Manatutu iha loron 26 Novembru lorokraik tuku 15.00, kontinua bá tau ai-funan iha Jardim Heroi Manatutu nian.

Seremónia tomak sei kulmina iha loron 28 Novembru iha Villa Manatutu, liu-liu iha forma de serimónia isar Bandeira Nasionál ne’ebé mak sei hahú iha dadersan tuku 08.00 no sei termina por volta iha tuku 11.00.

Iha serimónia Isar Bandeira, sei prezide husi Xefe Estadu ho diskursu iha loron 28 Novembru tinan ne’e, kontinua  kondekora veteranu sira na’in 74 hosi rai laran no mós na’in-lima hosi rai li’ur.

“Sei termina ho serimónia hatun Bandeira ne’ebé sei realiza iha kampu hanesan iha tuku 17.00 lorokraik, tan ne’e sei prezide hosi Prezidente Parlamentu Nasionál,” Miguel Pereira de Carvalho hateten iha Palásiu Prezidensiál Nicolau Lobato Bairru-Pité, Kinta (17/11/2022).

Iha kalan sei realiza konsertu muzikál, ne’ebé mak sei anima hosi joven sira iha Manatutu no mós sira seluk tán.

Jornalista: Vito Salvadór