Hatutan.com, (22 Novembru 2022), Díli— Rai nakdoko iha área Cianjur Provínsia Jawa Oeste, Indonézia ho nia magnitude 5,6 hamate ema na’in 162 iha Segunda (21/11/2022).
Vítima Rai nakdoko iha área Cianjur Provínsia Jawa Oeste, Indonézia, Segunda (21/11/2022). Foto Dasril Roszandi/Anadolu Agency via Getty Images.
Governadór Jawa Oeste, Ridwan Kamil relata númeru mate ne’e no iha vítima kanek grave ho kaman atus resin liu hosi publikasaun iha ninia akun Twitter no publika hosi BBC News Indonézia, Tersa (22/11/2022).
Dadus ne’e Governadór hetan hosi call center BPBD Cianjur, iha Segunda kalan tuku 21.00 Oras lokál ne’ebé iha totál uma ne’ebé hetan estragus hamutuk 2.345 inklui populasaun 13.400 mak dezloka ona hodi refuzia iha fatin seguru.
Advertisement
Hatutan.com sita deklarasaun Ridwan Kamil hanesan publika iha BBC News Indonézia katak, oras ne’e daudaun sei kontinua ho vibrasaun Tremus Sekundárius nune’e situasaun iha fatin sei kontinua iha traumátiku.
Tuir Ajénsia Meteorolojia, Klimatolojia, no Jeofízika Indonézia, to’o Segunda (21/11/2022) kalan tuku 19.00 oras lokál, rejista iha vibrasaun Tremus Sekundárius dala 62.
BBC News Indonézia mós kontakta ona ho autoridade lokál balun iha área ne’e maibé seidauk bele fó informasaun tanba sei trauma hela.
Rai nakdoko no estraga uma barak iha área Cianjur Provínsia Jawa Oeste, Indonézia, Segunda (21/11/2022). Foto AFP no Getty Images.
Antes ne’e Governadór Jawa Oeste, Ridwan Kamil hateten ona katak, númeru vitima sei aumenta tanba ida-ne’e hanesan dadus provizóriu de’it.
Hanesan públika mós hosi Detik.com, katak iha fatin akontesminetu vítima barak sei kontinua mai iha Hospitál Jerál Cianjur hodi hetan asisténsia médika tanba balun kanek iha ulun, liman, isin lolon, ain no seluk tán.
Tuir Ajénsia Meteorolojia, Klimatolojia, no Jeofízika Indonézia katak, Rai nakdoko ne’e sentralizadu iha Sukalarang, Sukabumi, Jawa Oeset ho nia kle’an kilometru 11 ho nia vibrasaun to’o kedan área Cianjur, Garut, Sukabumi, Bandung, no mós Jakarta.
Advertisement
Líder másimu Ajénsia Meteorolojia, Klimatolojia, no Jeofízika Indonézia, Dwikorita Karnawati apela ba populasaun atu matan moris neon na’in tanba posibilidade sei iha rai monu iha tempu udan boot.