PNTL Preokupa ho Timor Oan Ne’ebé Dada Bandeira Nasaun Seluk Tama To’o Aldeia

Hatutan.com, (01 Dezembru 2022), Dili—Polísia Nasionál Timor-Leste (PNTL), liuhosi Komandante Jerál, Komisáriu Polísia Faustino da Costa preokupadu no lamenta tebes ho Timoroan sira ne’ebé mak harii fali bandeira nasaun seluk nian iha sira nia uma-oin, hahú hosi sidade tama to’o aldeia.

Timor sira fa’an Bandeira hosi nasaun 32 ne’ebé partisipa iha Kopa Mundiál 2022 iha Qatar, iha área Colmera, Sesta (02/12/2022).

Preokupasaun Komisáriu Faustino nian ne’e, durante eventu Kopa Mundiál até haluha atu dada Bandeira nasionál Timor Leste nian durante komemorasaun aniversáriu Proklamasaun Independénsia RDTL dala-47 iha 28 novembru.

Lee Mós: Adeptu Portugál 38 Ne’ebé Kontra Regra Tránzitu, Selu Multa Kada Motór $120

“Nasaun sira nia embiaxada harii hotu iha Timor. La’ós de’it iha kapitál Díli, até suku, aldeia mós. Entaun, sidadania ema bolu dehan country pride, bangga akan negara sendiri, ne’e buat ida ke ita presiza tenke tau konsiderasaun. Bele fans bá nasaun ne’ebé de’it, mais iha tempu ida ne’ebé ita tenke hatudu katak, ha’u timoroan, orgullu hanesan timoroan. Ida ne’e mak buat ida importante,” Faustino da Costa, hateten iha Kuartél Jerál PNTL Caicoli, Kinta (01/12/2022).

Ho preokupasaun ne’e maka Komandu Jerál mós alarma ona iha semana kotuk katak, loos duni bele simpatia, bele apoiu nasaun ne’ebé de’it mais semana ida ne’ebé Timor Leste atu selebra, komemora proklamasaun independénsia tenke  dada Bandeira nasionál.

“Maibé maioria sidadaun sira mak la dada ita nia bandeira, ita haree bandeira nasaun sira ne’ebé ita fans mak dada iha uma oin, tau iha motór, tau iha karreta,” Komisáriu PNTL, Faustino da Costa kestiona.

Tanba ne’e, Komissáriu ne’e apela ba sidadaun hotu katak tuir loloos, iha loron boot TL nian, timoroan sira tenke iha sentidu nasionalizmu no patritizmu hodi harii Bandeira RDTL nian sira sira nia uma oin.

Jornalista: Rogério Pereira Cárceres