Prezidente Komisaun Ezekutiva BTL,E.P, Carlos Peloi dos Santos, informa, BTL,EP asina kontratu ida ho kompañia lokál Zufado Unip Lda, atu bele halo serbisu melloramentu sistema bee-moos iha Suai Villa, espesífikamente iha Suku Debus, Suai Loro ho Camanasa.
Prezidente Carlos Peloi dos Santos, fiar katak, ho kontratu ne’ebé selebra ona, ohin bá oin, kompañia bele hahú ona ninia serbisu, hodi hahú prosesu kanalizasaun bee’ bá komunidade sira iha suku tolu ne’e.
Advertisement
“BTL, E.P nia parseiru liu-liu kompañia manán na’in, bele implementa tuir tempu ne’ebé mak iha, no espera, ita nia komunidade sira iha suku refere, ita nia autoridade sira iha postu ne’e mós apoiu ho BTL,E.P, ho kompañia, para sira bele halo servisu tuir tempu ne’ebé mak ita determina ona iha kontratu,” Prezidente Komisaun Ezekutiva BTL,E.P, Carlos Peloi dos Santos, hateten iha Salaun BTL,E.P, Caicoli, Díli.
Projetu ida-ne’e, hanesan kontinuasaun hosi projetu perfurasaun ne’ebé mak BTL,E.P halo ona iha Suai. Signifika, iha ona posu rua, no agora ne’e, hein de’it kanalizasaun bee-moos bá komunidade sira iha suku tolu ne’e.
Taxa Iha Covalima
Taxa asesu bee nian bá konsumidór sira iha Munisípiu Covalima rasik, BTL sei promove projetu foun, signifika, iha komunidade balu seidauk asesu bá bee, tanba ne’e, primeiru, BTL,E.P sei esforsa aan halo jestaun bá sistema sira ne’ebé iha ona.
Segundu, BTL,E.P kontinua promove projetu sira iha fatin hotu, atu bele fasilita komunidade sira, hodi bele asesu bá bee-moos.
Advertisement
Iha Suai rasik, alende projetu ida-ne’e, iha fulan hirak bá kotuk, BTL,E.P asina ona mós kontratu ho kompañia lokál ida bá kanalizasaun bee-moos iha Postu Administrativu Fohorem no daudaun ne’e, projetu refere la’o hela (on going).
Foin lalais, BTL,E.P lansa projetu foun ida iha Postu Administrativu Fatululik. Iha Postu Administrativu Fatumea, BTL,E.P foin mak halo levantamentu dadus. Tuir fali Postu Tilomar, oras ne’e, BTL,E.P halo hela perfurasaun.
“Osan ida ne’e, mak ita uza hodi halo operasaun manutensaun sistema bee sira ne’ebé mak iha, inklui mós promove projetu sira iha área rurál, no mós iha postu-postu sira,” Carlos Peloi dos Santos hateten.
Alende kontratu ne’ebé foin selebra, maibé duadaun ne’e iha ona mós projetu foun hamutuk 26 ne’ebé sei la’o iha munisípiu no postu administrativu sira. Projetu sira ne’e, implementa ona iha kapitál postu 11. Enkuantu, kapitál postu 14 mak sei iha prosesu aprovizionamentu.
Advertisement
Iha mós postu 22 mak BTL,E.P halo hela prosesu Dezeñu Detallada, presiza halo levantamentu dadus, iha Postu Administrativu Railaco ho Maucatar, Covalima nian.
Iha fatin hanesan diretóra Kompañia Zufado Unip Lda, Delfina Amaral Lopes, promete katak, sei implementa projetu kanalizasaun bee-moos ne’e bá komunidade sira ho kualidade, inklui sei konklui tempu fulan-neen (6) ne’ebé mak temi ona iha kontratu.
“Ida ne’e, la’ós buat foun, ne’e loos tiha ona, kualkér projetu iha fatin ne’ebé de’it, kuandu obra na’in ka owner project, nia fó desizaun katak, empreza finaliza duni projetu, tuir tempu ne’ebé determina,” nia hateten.
Tuir dadus, komunidade ho uma-kain iha suku-tolu ne’e, liu na’in-1500 no projetu ida ne’e sei implementa ho durasaun tempu durante iha fulan-neen nia laran, ho kustu orsamentu $830,000-resin.