Hatutan.com, (06 Dezembru 2022), Díli—Prezidente Repúblika ho delegasaun dezloka ona ba nasaun Singapura iha Tersa (06/12/2022), no tuir ajenda sei hala’o palestra públika iha Institutu Yusof Ishak.
Prezidente Repúblika ho delegasaun dezloka ona ba nasaun Singapura iha Tersa (06/12/2022). Foto/Média PR.
“Prezidente Repúblika sei hala’o palestra públika ida iha Institutu Yusof Ishak, ne’ebé sei modera hosi Ministru Relasoens Exteriores Singapura, Vivian Balakrishnan,” Hatutan.com sita komunikadu.
Ramos-Horta nia vizita ne’e hahú hosi loron 07 to’o 10 fulan Dezembru 2022, no delegasaun sei fila-fali mai Timor Leste iha loron 11 fulan Dezembru.
Advertisement
Durante vizita Estadu, Xefe Estadu, Ramos-Horta sei hala’o enkontru ho nia omólogu Prezidente Repúblika Singapura, Halimah Yacob, no Primeiru-Ministru Singapura, Lee Hsien Loong.
Primeiru-Ministru sei oferese almosu ofisiál ida ba Prezidente Repúblika h delegasaun no tuir mai banquete ka han kalan Estadu ida sei oferese hosi Prezidente Repúblika Singapura ba ninia omólogo Prezidente Timor-Leste, José Ramos-Horta.
Iha biban hanesan, Prezidente Repúblika Timor-Leste mós sei partisipa iha Fórum Empresariál, ne’ebé organiza hosi Governu Timor-Leste ho apoiu no partisipasaun hosi setór privadu sira hosi nasaun rua nian.
Ikus liu, Prezidente Repúblika sei la’o ain turístiku ida hodi hale’u Rezervatóriu ba Reaproveitamentu bee.
Singapura no Timor-Leste hametin parseria forte tebes ne’ebé hatur iha valór no objetivu komun sira. Rai rua ne’e mós asina kooperasaun bileterál kona-bá akórdu servisu aero no Singapura fó ona asisténsia téknika ba Timor-Leste, liu hosi formasaun ba funsionáriu públiku sira, liu 700.
Advertisement
Formasaun hirak ne’ebé ajuda hodi fó kontribuísaun ba dezenvolvimentu rekursu umanu iha Timor-Leste. Alem de investidór sira hosi Singapura barak mós mak investe iha Timor-Leste.