Defeza & Seguransa
Ameasa Komunidade ho Pistola, Oknum PCIC Dezarmadu no Hetan Sansaun Dixiplinár
Hatutan.com, (07 Dezembru 2022), Dili—Policia Sientífica e de Investigação Criminal (PCIC), liuhosi Superiór sira aplika ona sansaun dixiplinár bá membru ida ho naran inisial MO, inklui dezarmadu ka rekolla ona mós kilat hosi oknum ne’e, tanba uza pistola hodi ameasa komunidade balun iha portaun Boot Otél Terra Santa, Suku Comoro, Postu Administrativu Dom Aleixo, Munisípiu Díli.
Investigadór Xefe iha PCIC, Octavio da Costa Araújo.
Kazu ne’e akontese iha Sesta (25/11/2022), maizumenus tuku 22:00 kalan Otl, bainhira membru PCIC ho inisial MO ne’e hakarak atu tama partisipa mós iha serimónia festa kazamentu ida iha otél Terra Santa.
Lee Mós: Juñu-Jullu PCIC Rejista Kazu 128
Tuir loloos, ajenda bá serimónia festa kazamentu ne’e konvidadu sira tenke tama hotu ona iha salaun iha tuku 21:00 to’o tuku 21:30.
Maibé, tanba membru PCIC ne’e bá fali iha tuku 22:00 kalan Otl, signifika tarde liu ona nune’e seguransa sira iha portaun boot la autoriza atu ema seluk tama tán bá serimónia, tuir orientasaun ne’ebé fó hosi festa na’in.
Tanba sente la satifás, ikus-mai membru PCIC ne’ebé ho kondisaun lanu, hasai pistola ne’ebé sikat hela iha nia sorin, karrega hodi ameasa security sira iha portaun oin.
La’ós de’it ameasa ho kilat, oknum PCIC ne’e mós hasai liafuan aat balun hodi insulta no tolok pesoál seguransa sira iha otél nia oin to’o mosu haksesuk malu.
“Kalan akontese, iha dadeersan ita foti kedan armas hosi nia liman, ita esklui ka hasai kedan nia hosi ekipa ne’e no ita halo kedan prosesu dixiplinár,” Portavós PCIC, Octávio da Costa Araújo hateten iha kna’ar fatin Caicoli, Kuarta (07/12/2022).
Portavós PCIC, Octávio dehan PCIC iha nia regulamentu própriu bá porta arma hodi regula investigadór ida ka superior ida bainhira lori armas ka kilat no regra ida rigorózu tebes.
Maibé, membru PCIC ne’ebé ho pozisaun hanesan mós Investigadór ne’e, iha kalan ne’e hetan duni autorizasaun legál hosi superiór sira atu uza arma ne’e, tanba iha momentu ne’ebá membru refere involve hela ekipa serbisu bá operasaun ninian hodi ezekuta mós mandadu judisiál ida hosi Ministériu Públiku (PM).
“Nia hala’o hela serbisu, entaun nia hetan despaixu legál, hodi lori arma fora de serbisu. Maibé, la’ós autoriza nia lori bá festa. Nia tau iha nia kanotak ne’e legál, tanba nia tama hela iha grupu ida ne’ebé mak 24 oras nia laran, buka hela autór ruma, tuir mandadu judisiál ka Tribunál ninian,” portavós Octávio, esplika.
Bainhira sees hosi oras serbisu nian, membru sira iha autorizasaun atu uza armas, maibé husu membru sira atu labele haluha katak, la’ós uza lori bá festa.
“Entaun, iha momentu ne’ebé pur eskuidu, pur erru, nia lori to’o bá iha festa no nia tenke hatán bá iha prosesu. Entaun, iha momentu kalan ne’e, akontese, dadeersan, hosi parte Gabinéte Inspesaun no Dixiplinár (GID), ho parte Departamentu Armentu no Seguransa, imediatamente foti kedan armas hosi nia liman no hosi GID loke kedan prosesu dixiplinár,” Octávio Araújo, hateten.
Oras ne’e prosesu prosesu investigasaun no prosesu administrativu bá membru PCIC ne’e la’o hela, tanba relasiona ho ninia aktu sira.
Iha prosesu ida ne’e, PCIC mós rekolla ona mós informasaun balun hosi parte testamuña sira inklui vitima sira ne’ebé mak sente ameasadu iha momentu ne’ebá.
Apela mós ba ema ruma sente ofendidu ho nia lori arma ne’e sei notifika hotu, rona depois PCIC sie haree nia grau kulpa ne’e monu bá iha violasaun saida.
Oras ne’e daudaun membru ne’e tama hela serbisu, maibé iha serbisu balun ne’ebé mak limita tiha ona relasiona ho nia asaun no prosesu interna dixiplinár ninian hala’o nafatin.
Jornalista: Rogério Pereira Cárceres