“Ita nia rain presiza imi joven sira. Iha fatin balun iha Díli grupu joven sira, baku-malu, tuda-malu. Ida ne’e maka ita hakarak evita hodi halo jogu sira hanesan ne’e hodi imi joven sira hasoru-malu iha jogu manán ka lakon imi kria nafatin dame no domin hodi komunidade kontente,” Kay Rala Xanana Gusmão hateten perante komunidade iha kampu demokrasia Postu Administrativu Lospalos-Vila, Munisípiu Lautém, Kuarta (07/12/2022).
Advertisement
Taxa Rotativa Avó Nana 2022, partisipa hosi klubu hamutuk 32, durante jogu partisipante no adeptus sira hatudu disiplina tebes, iha fraternidade no amizade hodi partisipa iha kada jogu to’o ikus manán.
Ekipa FC Tokodede ne’ebé hetan primeiru lugar iha kompetisaun finál jogu Taxa Rotativa Avó Nana 2022 ne’ebé hala’o durante fulan ida konsega halakon advesariu FC Boca Junior ho golu 1-0 ho ida ne’e Fc Boca Junior sai hanesan segundu lugar, enkuantu klube AC Mailua hetan terseiru lugar no kuartu lugar okupa hosi FC Lere-Loho.
Lider Lider Istoriku nu’udar mós Prezidente Klube AD-SLB Laulara, Kay Rala Xanana Gusmão iha nia intervensaun hateten jerasaun tuan atu ba hotu ona, husik hela imi joven sira, respeita netik funu na’in sira, prepara aan labele fahe-malu no labele hamosu funu foun entre imi ho imi.
Xanana agradese tanba durante jogu joven sira kontinua kesi metin sira nia unidade no domin hodi buka hametin dame liu hosi desportu futeból.
Taxa Rotativa Avó Nana 2022 nu’udar parte ida hodi promove mós dokumentu fraternidade umana ne’ebé reafiarma hosi Papa Fransisco hodi promove dame ba mundu tomak.
Advertisement
Apela ba joven sira liu-liu iha Dili atu hadok an hosi grupu organizasaun arte marsiál no arte rituál sira ne’ebè la promove dame, maibé buka kria mak problema, halo violénsia to’o hamosu krime omesídiu.
Iha Fatin hanesan, Prezidente Autoridade Munisipiu Lautém, Domingos Xavio agradese ba klubu 32 ne’ebé hatudu komportamentu durante eventu to’o termina.
Domingos agradese ba esforsu di’ak hotu ne’ebé Maun Boot Xanana halo hodi lori unidade ba karii iha joven sira nia leet.
Prezidente Autoridade Lautém agradese mós ba patrosinadór sira hanesan, York Tansport, In-Canto, Jonize no emprezáriu Lautém oan tomak ne’ebé fó apoiu másimu ba juventude ne’ebé partisipa ona iha jogu ne’e.