Primeiru-Ministru (PM), Taur Matan Ruak, Sesta (09/12/2022), ofisiálmente lansa projetu reabilitasaun estrada hosi Aldeia Uaiaca, Suku Abafala, Postu Administrativu Quelicai-Baucau bá Suku Nahareka, Postu Administrativu Ossu, Munisípiu Viqueque. Foto/Rogério Pereira Cárceres
Obra boot ho kustu orsamentu $16.547,661,76 ne’e ezekuta hosi empreza internasionál Chonqing International Construction Corporation (CICO). Projetu reabilitasaun estrada ne’e ho ninia distánsia kilómetru 22,7 ne’ebé mak kompostu hosi asphalt metru 4, alargamentu metru ida (1), no ninia ombru metru rua (2).
Hahú hosi 2020, halo ona preparasaun bá iha estudu ne’ebé mak hanaran Detail Engineering Design. Manán na’in ne’ebé mak halo estudu, hosi konsultór Níceles, liuhosi konkursu públiku, no hetan kontratu ho kustu orsamentu $499,65.
Advertisement
Iha fulan-setembru 2021 hetan verifikasaun hosi Ajénsia Dezenvolvimentu Nasionál (ADN), hetan aprovasaun hosi Concelho Administração do Fundo da Infra-estrutura (CAFI).
Hafoin aprovasaun hosi Konsellu Ministrus, kontinua kedan lori bá iha Komisaun Nasionál bá Aprovizionamentu (CAN) hodi halo konkursu públiku no konkursu ne’e remata iha fulan-Setembru 2022.
Obra ida-ne’e, sei hetan supervizaun hosi konsultór internasionál, ne’ebé mak liuhosi prosesu konkursu hosi Malázia, Konsep Perondi, no ninia kustu supervizaun $452,122.
Projetu reabilitasaun estrada ne’e oinsá mak atu mellora asesu rodoviáriu, no seguransa rodoviáriu iha korredór Uaiaca-Quelicai, kobre hosi munisipiu, postu administrativu, to’o iha aldeia no mós bele atria turista sira bele hakat liubá foho Matebian.
Advertisement
Tuir kontratu ne’ebé Governu selebra ho kompañia kontraktor katak, durasaun tempu bá projetu reabilitasaun estrada ne’e, sei lori tempu durante fulan-18, katak tinan ida, fulan-neen (6), tenke finaliza.
Primeiru-Ministru (PM), Taur Matan Ruak, husu bá komunidade sira atu koopera ho kompañia kontraktor, hodi nune’e, bele konklui tuir tempu ne’ebé determinadu, no kontribui bá prosesu dezenvolvimentu nasionál Timor-Leste nian.
Taur Matan Ruak kontente tebes, tanba bele hamutuk ho komunidade sira hodi halo lansamentu bá kontinuasaun estrada Uaiaca bá Nahareka. Ne’ebé, Taur rasik konsidera, lansamentu bá projetu reabilitasaun ne’e hanesan pasu ida importante bá populasaun Quelicai.
“Mais importante liu, ha’u hakarak ita boot sira hotu kontribui. Ai-horis oan ruma, fatuk kona to’os, kona bee-dalan ruma, favór ida, kontribui,” Primeiru Ministru (PM), Taur Matan Ruak, hateten durante diskursu serimónia lansamentu projetu reabilitasaun estrada ne’e.
Taur dehan, iha Timor, eziste totál suku 452. Estrada ida-ne’e, kona de’it suku hira. Signifika iha fatin seluk, populasaun sei hamriik hein, bainhira mak to’o bá sira. Ezemplu, estrada iha Ermera bá Hatubuilico, to’o agora seidauk hadi’a.