TMR Promete Projetu Boot Tolu bá Povu Quelicai

Hatutan.com, (09 Dezembru 2022), Baucau-Primeiru-Ministru (PM), Taur Matan Ruak,  hateten, iha nia mandatu iha VIII Governu Konstitusionál ne’e sei halo tán projetu boot tolu (3) bá populasaun sira iha Postu Administrativu Quelicai, Munisípiu Baucau.

Lee Mós : Governu Lansa Projetu Reabilitasaun Estrada Quelicai-Ossú ho Kustu $16.547,661,76

Governu ofisialmente lansa projetu reabilitasaun estrada hosi Aldeia Uaiaca, Suku Abafala, Postu Administrativu Quelicai bá Suku Nahareka, Postu Administrativu Ossu, Munisípiu Viqueque, Sesta (09/12/2022). Foto/Rógerio Pereira Cárceres

“Bá Quelicai, ha’u iha projetu boot tolu bá ita-boot sira. Ida, ha’u hakarak fó estatutu bá ita-boot sira, envés Quelicai ida de’it, bá postu tolu no ha’u hatene, ha’u nia ministru mai, ko’alia ona ho ita-boot sira para haree ida-ne’e, no ha’u espera katak, mehi ida ita-boot sira nian, naruk, kleur, bele akontese,” Primeiru Ministru (PM), Taur Matan Ruak, promete bá populasaun sira iha diskursu serimónia lansamentu projetu reabilitasaun estrada iha Aldeia Uaiaca, Suku Abafala, Postu Administrativu Quelicai, Munisípiu Baucau bá Postu Administrativu Ossú, Munisípiu Viqueque, Sesta (09/12/2022).

Primeiru-Ministru Taur Matan Ruak mós rekoñese katak, ‘atu halo’ ida ne’e, la fasil, tanba kuandu  aumenta postu, aumenta dapur no bainhira aumenta dapur tenke aumenta bikan, aumenta sanan, aumenta ibun.

“Governu desididu para avansa ho ida-ne’e no karik, ho apoiu ita-nia na’i deputadu sira nian, parlamentu nasionál nian, ida-ne’e sei akontese. Entaun, eleva ita-boot sira-nia estatutu, postu ida, bá tolu. Organiza malu di’ak liu, ajuda malu di’ak liu, no serbisu maka’as liu para  ita-boot sira nia postu, suku, bele dezenvolve aan. Ne’e primeiru,” Taur Matan Ruak,  hateten.

Iha kompromisu ida segundu, Taur dehan, estrada iha Quelicai tenke hadi’a hodi liga bá Postu Administrativu Ossú. Primeira faze sei to’o de’it iha Suku Nahareka, mais tuir mai, sei bá Ossú. Ida-ne’e, atu ajuda populasaun sira liga iha estrada alternativa bá Viqueque, ne’e di’ak.

Kompromisu ida seluk (datoluk) maka, Primeiru-Ministru Taur hakarak husu bá Ministru Obras Públikas ho nia vise, atu kontinua haree hadi’a tán hakarak estrada hosi Lelalai bá Uailili, atu nune’e, sé komunidade sira lakohi liuhosi Quelicai, bele liuhosi ida ne’ebá, besik liu.

“Entaun, fó opsaun bá imi, fó dalan bá imi. Bá mai lais, lori imi nia sasán lalais. Ne’e ha’u nia projetu tolu, no ha’u espera la hotu iha ha’u nia tempu, sei mai kontinua serbisu nafatin, para ke obras ida ne’e la’o di’ak,” Xefe Governu, Taur Matan Ruak, hateten tán.

Taur dehan, populasaun Quelicai nia riku mak foho Matebian. Fatin ida ne’ebé atrai ema bele vizita, haree, furak. Mais para ida ne’e, estrada tenke di’ak.

“Ita iha turizmu relijiozu, sé ita boot sira bá iha foho leten ne’ebá, ema hakarak bá, maibé ita-nia estrada di’ak. Sira mai lalais, hela iha ne’e, sa’e neineik bá to’o iha leten. Tanba ne’e, parabens bá Quelicai sira,” PM Taur Matan Ruak tenik.

Jornalista: Rogério Pereira Cárceres