Star King Konstrui “Jardim da Chama Eterna” ho Kustu Millaun $5

Hatutan.com, (16 Dezembru 2022), Díli—Autoridade sira hosi parte Muzeu Rezisténsia ho Star King Construction, realiza ona serimónia Asinatura Kontratu hodi hahú Konstrusaun obra Jardim da Chama Eterna.

Dezeñu Jardim da Chama Eterna.

Obra ida-ne’e kaer hosi Empreza Star King Construction no DMF Acesso iha Joint Venture, ho supervizaun hosi Konsórsiu Soares & Guterres iha Joint Venture ho 3CLX Enjeñaria, iha ne’ebé sei hahú iha tinan 2023 ho durasaun fulan 18. 

“Jardim da Chama Eterna reprezenta investimentu públiku ida ho totál $5.059.000,00, iha ne’ebé $4.548.000,00 ba konstrusaun obra, $351.500,00 ba supervizaun obra no besik $160.000,00 aloka ba  realizasaun estudu tékniku,” Hatutan.com sita deklarasaun Diretór Ezekutivu & Prezidente AMRT,I.P, Hamar Antoninho Alves iha komunikadu, Sesta (16/12/2022).

Jardim da Chama Eterna ne’e signifika pasu importante ida ba divulgasaun patrimóniu istóriku paíz nian,  nune’e mós hametin identidade nasionál.

Hamar Antoninho Alves  konsidera ida ne’e hanesan orgullu bo’ot ba AMRT, dezenvolvimentu ba projetu ne’e, Jardim da Chama Eterna, iha ne’ebé ninia Inagurasaun prevé ba tinan 2024.

Edifísiu ida-ne’e sei sura ho Jardin ida ho Memória ba Erói Libertasaun Nasionál, ne’ebé fó sira-nia vida tomak ba Independénsia Timor Leste nian.

Aleinde Jardin ne’e, iha mós espasu espozitivu ida, iha ne’ebá sei ko’alia kona-bá períodu Istóriku hosi Administrasaun Koloniál Portugeza no antesedente hosi Invazaun Militár Indonézia.

Arkivu no Muzeu Rezisténsia Timorense, oferese ba públiku narativa ho momentu istóriku ida ne’ebé bo’ot liu iha paíz ne’e, hosi períodu koloniál Portugés to’o Restaurasaun Independénsia.

Arkivu no Muzeu Rezisténsia Timorense mak arkivu no muzeu ida ne’ebé sei realiza, promove no patrosina asaun sira ho natureza kulturál, sientífika no edukativa iha prezervasaun no divulgasaun memória luta Rezisténsia hosi Povu Timor-Leste, rekoñesimentu no valorizasaun sosiál veteranu sira nian, konsolidasaun identidade nasionál, istória kontemporánea Timor-Leste nian no promosaun paz no respeitu ba Direitus Umanus.

Jornalista: Elio dos Santos da Costa