Deskonfia “Xoke-mate” Kolega Serbisu, PNTL Submete PA bá Ministériu Públiku

Hatutan.com, (20 Dezembru 2022), Díli—Polisia Nasionál Timor-Leste (PNTL) sei submete no prosesa autór ho inisiál PA bá Ministériu Públiku (MP), tanba deskonfia ho karreta kompañia nian “xoke mate” nia kolega ne’ebé serbisu hamutuk iha kompañia ida.

Komandante Polísia Tránzitu Munisípiu Dili, Inspetór Xefe Polísia, Domingos Sarmento Gama.

Komandante unidade Tránzitu Munisipiu Díli, Inspetór Polisia, Domingos Sarmento Gama haktuir kronolójia katak, iha 17 Dezembru 2022 hale’u tuku 09:00 dadeer Otl, kondutór PA (40) ho nia kolega Felix da Silva (31), simu orientasaun serbisu hosi na’in ba kompañia, ho karreta sai hosi Ai-mutin bá Bairru Sentrál, atu tula ai-nitas tahan ne’ebé ta’a ona besik Klínika Bairru Formoza, hodi tula bá so’e iha lixu fatin.

Lee Mós: Ema Na’in-neen Mate Ho Asidente Durante Finadu

Bainhira to’o iha lixu fatin, Felix da Silva tun uluk, hamriik iha kotuk hodi manda karreta atu bele tama besik bá lixu fatin refere hodi bele tula ai-tahan bá karreta laran. Maibé, karreta ne’ebé nia kolega kondús, hakiduk tama bá sintina ida nia ku’ak to’o karreta haliis, ikus-mai hanehan Felix iha karreta kotuk to’o lakon vida.

“Asidente fatal ne’e, akontese iha tuku 9:00. Sira na’in-rua serbisu iha kompañia ida, sa’e karreta ida, atu mai foti ai-tahan ida ne’ebé mak kompañia ta’a. Maibé, iha ne’ebá iha sintina ka posu ne’ebé mak sira la haree. Entaun tama iha posu laran, halis hodi hanehan vítima mate iha fatin kedan. Evidénsia karreta ne’e iha ita nia edifísiu, suspeitu hein hodi prosesa. Kazu ita rejista ona no hein lori bá Ministériu Públiku,” Inspetór Polisia, Domingos Sarmento Gama hateten iha kna’ar fatin Komandu Caicoli, Segunda (19/12/2022).

Akontesimentu ida-ne’e, rezulta vítima hetan pankada maka’as iha parte ulun no hirus matan. Hafoin asidente, komunidade sira ne’ebé hela besik, kontaktu kedan bá ambulánsia hodi evakua bá Hospital Nacional Guido Valadáres (HNGV), Bidau, maibé to’o iha sala emerjénsia, labele salva vida tanba vítima mate antes iha fatin asidente.  

Karreta ne’ebé hanehan mate vitima Felix da Silva, ho marka Mitsubsubishi Fuso, kór kinur, xapa matrikula 50-171 TL oras-ne’e, evidénsia karreta ne’e Polisia asegura ona iha Komandu PNTL Munisipiu Dili, Caicoli.

Asaun polisiál ka maneira ne’ebé PNTL foti maka asegura fatin asidente, rekolla interveniente sira, evakua vítima bá Ospitál, lori evidénsia karreta fuso bá komandu no hala’o prosesu investigasaun kriminál.

Tuir Lei Kódigu Penál Timor-Leste, artigu 140, Asidente Trafegu Fatál ne’e ‘duun’ suspeitu PA involve iha tipu krime Omesídiu Neglijente.

Jornalista: Rogério Pereira Cárceres