Natál 2022, Tempu Atu Halo Solidariedade bá Malu

Hatutan.com, (23 Dezembru 2022), Díli—Arsebispu Arkedioseze Metropolitana Díli, Dom Virgílio Cardeal do Carmo da Silva, SDB konvida sarani sira atu halo solidariedade bá malu no iha proximidade bá maluk sira ne’ebé terus.

Sua Eminénsia Kardeal Dom Vírgilio do Carmo da Silva, SDB, Arsebispu Arkedioseze Metropolitana Díli. Foto/Hatutan.com

Dom Virgílio fó-sai konvite ne’ebé mai hosi Papa Francisco iha Natál tinan ida ne’e nian, tanba Natál tinan ne’e hanesan momentu importante atu ema hotu hatene solidariza ba malu no iha proximidade ho ema seluk hanesan kriatura Maromak nian.

Lee Mós: Prezidente Repúblika Festa Natal ho Povu

“Natál la’ós atu hanoin an de’it maibé hanoin mós maluk sira ne’ebé la hetan posibilidade, fasilidade no meius sira atu selebra,” Dom Virgílio Cardeal do Carmo da Silva, SDB fó sai konvite ne’e  hanesan mós mensajen Natál nian iha Câmara Eclesiástica, Lecidere, Sesta (23/12/2022).

Tinan 2022, ema hotu-hotu haksolok tanba bele halibur hamutuk atu selebra loron Natál, la’ós hanesan tinan rua liu bá tanba ameasa pandémia Covid-19.

Funu entre Rúsia ho Ukránia la’ós de’it lori todan ba nasaun rua ne’e, maibé afeta ba mundu no halo inflasaun globál, hamlaha iha mundu kontinua, halo nakukun kalan Natál nian kontinua hafalun umanidade, ne’ebé mosu hosi hahalok sabraut ema nian.

Tanba ne’e, hotu-hotu harohan atu naroman ne’ebé mai iha rai klaran leno ema hotu-hotu, atu ema hotu-hotu hatene rekoñese naroman bo’ot ida-ne’e.  

Naroman Natál nian halo ema hatene an, iha korajen loken fuan atu hatene no sente ema seluk nia terus, hamamar fuan, hatene perdua no hatene hadomi.

Kosok Oan Jesus nia prezensa lori hela mensajen furak ida ba hotu-hotu iha 2022, maske Maromak ida ne’ebé la’ós poderozu, la’ós forsa maibé konkista mundu, la’ós ho forsa atu konkista umanidade maibé moris hanesan kosok oan ida, labarik bai-ba’in ida, iha ema hotu nia leet ne’ebé presiza kariñu no domin.

Kosok oan ida  ne’ebé sai sinál ksolok nian, no sinál pás ba família hotu-hotu, liu-liu ba família sira iha rai doben Timor-Leste, no paz ida-ne’e bele kuda iha foinsa’e sira nia fuan, atu foinsa’e hotu-hotu bele sai instrumentu pas ba rai doben Timor-Leste.

Arsebispu Arkedioseze Metropolitana Díli mós hato’o boas festas Santu Natál no desezu rahun kmanek tinan foun 2023, tinan ida nakonu ho rahun di’ak ba autoridade Estadu, governu, Uma-Kreda nian no sarani tomak iha rai doben Timor-Leste.

Jornalista: Vito Salvadór