Prezidente Repúblika Fahe Prezente Natal Bá Komunidade Balibar ho Tibar

Hatutan.com, (24 Dezembru 2022), Díli- Prezidente Repúblika (PR), José Ramos-Horta, liuhosi Gabinete Prezidénsia Repúblika, hala’o distribuisaun ai-han no prezente natal nian bá populasaun no estudante sira iha aldeia haat hosi Suku Balibar no mós bá populasuan sira iha Aldeia Libau-Lelo, Suku Tibar, Postu Administrativu Bazartete, Munisípiu Liquiça.

Lee Mós : Prezidente Repúblika Festa Natal ho Povu

Gabinete Prezidénsia Repúblika, hala’o distribuisaun ai-han no prezente natal nian bá populasaun no estudante sira iha aldeia haat hosi Suku Balibar. Foto/GPR

Distribuisaun ai-han no prezente natál ho pakote 250 ne’e fahe direita hosi ekipa Gabinete Prezidente bá populasaun sira hosi Suku Balibar kompostu hosi Aleia  Fatuloda, Lacoto, Tankae no Lorico Balibar, Sesta (23/12/2022).

Liuhosi komunikadu  imprensa ne’ebé Hatuta.com asesu, Sábadu (24/12/2022), informa Sekretáriu Ezekutivu Kaza Sivíl, Filomeno Romulo dos Santos Lay, hateten ai-han no matéria natál hanesan, livru lapizeira, régua no sasan seluk tan fahe populasaun no estudante sira hodi bele prepara aan selebra loron boot Natál, 25 Dezembru 2022 no tinan foun 01 Janeiru 2023 ho dame.

Nia afirma, apoiu ne’e labele haree ba ninia valór, maibé distribuisaun ne’e hala’o iha territóriu Timor-Leste no PR Ramos-Horta rasik halo ona natal ida ho tema “Natal do Povu” ne’ebé hala’o ona iha resintu Palásiu Prezidensiál iha Kinta, 22 fulan-Dezembru 2022.

“Apoiu ida ne’e oferese hosi Avó Prezidente Ramos-Horta ba ama ferik sira, inklui ita-nia oan estudante sira iha munisípiu no mai iha Balibar  hodi ama no oan sira bele kontente simu ita-nia festa natál no tinan foun ho dame,” Filomeno Romulo dos Santos Lay hateten.

Iha fatin hanesan, populasaun no estudante sira hosi Suku Balibar nian hato’o agradese ba PR Ramos-Horta ne’ebé kontinua lolo-liman no kari domin bá povu sira liuhosi fó apoiu ai-han no material eskola nian.

Apoiu Nesesidade Bazika bá Uma-Kain 24 iha Tibar

Gabinete Prezidénsia Repúblika, hala’o distribuisaun ai-han no prezente natal nian bá populasaun Suku Tibar. Foto/GPR

Prezidénsia Repúblika apoia mós nesesidade bázika ba família kbiit-laek hamutuk uma-kain 24, iha Aldeia Libau-Lelo, Suku Tibar, Postu Administrativu Bazartete, Munisípiu Liquiça.

Xefe Aldeia Libu-Lelo, Domingos Serrão Fátima da Conceição, agradese bá laran luak husi Prezidénsia Repúblika hodi tulun família vulnerável.

“Nu’udar autoridade lokál no reprezentante Xefe Suku agradese tebes, fó parabéns Prezidente Repúblika ho nia ekipa tomak, hanesan aman ne’ebé hadomi duni nia povu ida-ne’e, ami orgullu tebes,” Domingos Serrão Fátima da Conceição hateten.

Reprezentante Komunidade Aldeia Libau-Lelo, Bere Huno, hanesan mós veteranu agradese inisiativa hosi Prezidénsia Repúblika.

“Ohin loron hanesan grasa Maromak nian, tanba bele hetan apoiu husi Prezidente Repúblika, mai ami atan-oan sira, ha’u mos katuas ona, lori buat ida mos labele, nee duni Maromak tulun Prezidente bele mai ajuda,” Bere Huno hateten.

Adjunta Xefe Kaza Sivil Prezidénsia Repúblika, Henriqueta da Silva hateten, apoiu ne’e reprezenta Prezidente Repúblika nia domin ba povu hotu, hodi selebra natál no tinan foun.

“Ho sasán uitoan ne’ebé karik mak la boot liu, maibé atu lori de’it domin Prezidente nian bá sira, atu hatudu katak Prezidente Repúblika hamutuk hela ho sira iha situasaun saida de’it, li-liu festeja natal ho tinan foun,” nia hatete.

Asaun Karitativa ne’e atu fanu mos ema seluk ne’ebé iha kbi’it natoon hodi tulun sidadaun ne’ebé presiza no kontribui mos ba dezenvolvimentu nasionál.

Sasán ne’ebé distribui husi Adjunta Xefe Kaza Sívil no Asesór Prezidénsia ba Asuntu Sosiál Quintiliano Moniz bá sidadaun sira mak hanesan, foos saka 24, supermi dos 24, mina inklui sira seluk tan.

Husi benefisiáriu sira, Veteranu Bere-Huno mak hetan apoiu espesiál hanesan, nesesidade bázika, kadeira meza, kolxaun, rice-cooker no buli chock.

Jornalista: Vito Salvadór