Dili
Autoridade Munisípiu Díli La Tolera Kobransa Ilegál iha Semitériu Públiku
Hatutan.com, (04 Janeiru 2023), Díli—Prezidente Autoridade Munisípiu Díli (PAMD), Guilhermina Filomena Saldanha Ribeiro alerta ona no sei la tolera pesoál koveiru sira ne’ebé halo kobransa ilegál iha semitériu públiku sira.
Semitériu Paubliku Santa-Cruz. Foto/Espesiál.
Prezidente Autoridade Munisípiu Díli alerta ne’e relasiona ho informasaun balun ne’ebé espalla iha públiku kona-bá deskonfia pesoál balun halo kobransa ilegál ba populasaun ne’ebé hakoi mate-isin ho montante osan ne’ebé boot.
Lee Mós: Governu Tau $200,000 Prepara Kondisaun iha Semitériu Públiku Metinaro
“Bainhira iha ema ruma halo kobransa ilegál ita husu atu mai halo keixa, nune’e ita hola medida direta hodi hapara situasaun ne’e labele kontinua,” Guilhermina Filomena Saldanha Ribeiro hateten iha edifísiu Komandu PNTL munisípiu Díli, Caicoli, Kuarta (04/01/2023).
Guilhermina Filomena Saldanha Ribeiro informa katak, kobeiru sira ne’ebé servisu iha semitériu públiku sira iha Díli laran ne’e mai hosi Administrasaun Munisípiu Díli nia ema.
Tanba ne’e, Autoridade laiha orientasaun bá pesoál sira ne’e atu halo kobransa ba komunidade ka husu família matebian atu selu sira, tanba Estadu selu sira atu ke’e rai ku’ak no hakoi mate-isin.
Autoridade mós preokupa no lamenta tebes ho preokupasaun hosi família matebian sira kona-bá pesoál koveiru sira iha semitériu Becusse no Cacaulidun halo kobransa bainhira haloot mate-isin.
Ho ida ne’e, dala ida tán Prezidente Autoridade ne’e hakarak subliña katak, iha Lei la hakerek kona-bá halo kobransa iha semitériu públiku sira tanba semitériu públiku ne’e gratuita.
Antes ne’e bainhira simu informasaun Autoridade bolu ona koordenadór koveiru iha kada semitériu hodi fó xamada katak, laiha orientasaun atu koveiru sira halo kobransa ba família matebian.
Jornalista: Vito Salvadór