Ramos-Horta Sei Halo Promosaun bá Potensialidade Turístika no Kafé TL Iha WEF

Hatutan.com, (16 Janeiru 2023), Díli—Prezidente Repúblika, José Ramos-Horta sei halo promosaun bá potensialidade turístika no Kafé Timor-Leste (TL) nian durante partisipa World Economic Forum (WEF) iha nasaun Suisa.

Prezidente Repúblika, José Ramos-Horta dezloka ba Suisa hodi partisipa iha World Economic Forum (WEF), Segunda (16/01/2023). Foto/Média PR.

“Partisipasaun Timor-Leste nian iha WEF hanesan oportunidade atu halo promosaun ba potensialidade turístika no promove produtu Kafé original Timor-Leste ba mundu atu bele heta fama hanesan produtu ida ne’ebé identiku ho identidade Timoroan sira nian,” Hatutan.com sita deklarasaun Ramos-Horta iha komunikadu, Segunda (16/01/2023).

Lee Mós: Ramos-Horta Motiva Populasaun Ermera Kuda Kafé Barak

Partisipasaun Xefe Estadu iha WEF ne’e, tanba hetan konvite direta hosi Prezidente World Economic Forúm, Borge Brende no ema lubuk ida iha mundu bá iha World Economic Forum kada tinan.

“Nu’udár destinu turístiku, promosaun ba Timor nia produtu no seluk tán. Ha’u hakarak haree forte liután ita-nia kafé nia fama halo publisidade, ha’u halo makas loos iha mundu,” Xefe Estadu argumenta.

Durante iha Suisa, Prezidente Repúblika sei hasoru malu ho alta entidade hosi nasaun oi-oin no investidór balun, hodi ko’alia kona-bá programa kooperasaun iha área oi-oin.

Prezidente Repúblika, José Ramos-Horta ho delegasaun sei fila-fali mai Timor-Leste iha loron 21 fulan-janeiru 2023.

Parlamentu Nasionál aprova ajenda vizita Prezidente Repúblika bá Brazil no Suisa iha loron 19 fulan Dezembru tinan 2023, ho votus afavor 46, kontra no abstensaun 0.

Jornalista: Vito Salvadór