Arguidu Ida ho Nia Kolega Tenta “Baku” Prokuradór Domingos Barreto

Hatutan.com, (18 Janeiru 2023), Díli-Arguidu ida ho inisial A hamutuk ho nia kolega mane ida no tenta “baku” Prokuradór Domingos Barreto iha nia serbisu fatin, tanba la satisfás ho notifikasaun ne’ebé notifika hosi Ministériu Públiku (MP) liuhosi prokuradór ne’e rasik.

Prokuradór Domingos Barreto. Foto/Elio dos Santos da Costa

Prokuradór Domingos Barreto, ne’ebé mak sai hanesan vitima haktuir, kazu ne’e mosu iha Tersa (17/01/2023),  hale’u tuku 09:00, Otl, iha nia serbisu fatin.

Iha prosesu ida ne’ebé mak nia notifika lezadu ho arguidu sira kona-bá kazu ho estragus sasán iha Postu Administrativu Metinaro, Díli.

Iha notifikasaun ne’e, Prokuradór ne’e notifika nia iha tuku 08:00. Bainhira to’o iha prokuradór ne’e nia Gabinéte, servisu fatin, hodi rona tiha uluk vitima. Hafoin rona fali arguidu ho inisial A.

Molok atu Arguidu A ho nia kolega ne’e atu tama sala laran hodi fó sira nia deklarasaun, sira na’in-rua (arguidu ho nia kolega) hasai sobu tiha papan-nama ne’ebé mak tara iha prokuradór nia odamatan tama ne’e, inklui hasai mós fotográfia.

Bainhira arguidu ne’e tama bá sala rana, akompaña mós ho nia kolega ida. Nune’e, prokuradór Domingos Barreto husu bá arguidu A ne’e ninia kolega katak, nia presija rona de’it arguidu A ninia deklarasaun.

“Ita-boot ha’u la presija. Ida nia kolega ne’e. Entaun, nia kolega ne’e hatán dehan, lae, ha’u labele sai. Ha’u dehan, laiha, ha’u la notifika ita-boot, no ita-boot laiha interese iha prosesu ida-ne’e. Entaun, nia hatán dehan, ha’u la sai, depois nia taka odamatan. Entaun, kuandu nia taka odamatan, ida arguidu ne’e komesa hakilar ha’u dehan katak, ita-boot nia ofisial sira servisu laloos, notifika ha’u, ha’u la simu,” Prokuradór Domingos Barreto, konta bá jornalista sira iha Tribunál Distritál Dili (TDD),  Kuarta (18/01/2023).

Maske arguidu A ho nia kolega ne’e hatán ho emosaun, maibé Prokuradór Domingos Barreto husu bá sira atu tuur tiha lai, depois nia husu, problema saida. Problema bele rezolve. Infelizmente arguidu ho nia kolega ne’e la fó tempu bá prokuradór ne’e atu koalia. Ho nune’e, prokuradór Domingos Barreto baku nia meza ne’e, hodi dehan, husu bá arguidu sira atu bele rona nia ka lae.

“Kuandu ha’u baku meza ne’e, sira na’in-rua hamriik mai, hasoru kedas ha’u. entaun, sira na’in-rua hamriik hasoru kedas ha’u, komu rabat kedas ha’u ho ha’u nia meza ne’e, entaun, ha’u mós sente hanesan ameasadu. Agora, ha’u halo nusá maka ha’u bele sai, sees hosi sira na’in-rua, entaun, ha’u bá ho intensaun atu tuku, mais ha’u la tuku,  ha’u dudu sees nia, ha’u dudu sira na’in-rua rabat, depois ha’u halai sai,” Prokudarór Domingos Barreto konta.

Sente iha ameasadu nia laran, Prokuradór Domingos Barreto, bolu kedan polísia hodi halo atuasaun, no iha ne’ebá, Polisia mós halo kedan detensaun bá sira na’in-rua, no hodi promove mai iha TDD, hodi submete bá prosesu primeiru interrogatóriu judisial.

“Ne’e akuza ho krime Koasaun bá Majistradu, tanba ami majistradu sira hala’o hela ami nia kna’ar, no la fó tempu para ami atu hala’o ami nia kna’ar, hodi mai primeiru interrogatóriu iha ne’e, no kazu ne’e, oras ne’e arguidu na’in-rua ne’e, kumpri hela aprezemtasau periódika,” Prokuradór Domingos Barreto hateten.

Ho aktu sira hosi arguidu ho nia kolega ne’e, Prokuradór Domingos Barreto hetan ameasadu, no to’o oras ne’e mós sente la seguru. Tanba ne’e mak oras ne’e dadaun, nia rasik sei prepara karta ida, haruka bá iha Konsellu Majistratura Judisial, atu bele haree prokuradór sira hotu ninia situasaun.

“La’os ha’u de’it, mais situasaun en-jerál, para atu nune’e bele asegura ami nia serbisu, tanba sé lae, ami laiha, la ho livre atu hala’o serbisu. Ha’u la husu seguransa, mais pelu-menus kria kondisaun iha tribunál, iha Ministériu Públiku, bele tau seguransa,” nia tenik.

Jornalista: Rogério Pereira Cárceres