Profesór Japonés Na’in-Hitu Sei Hanorin Voluntáriu  Prátika Arte-Marsiál Iha TL

Hatutan.com, (18 Janeiru 2023), Díli—Governu Japaun liu hosi Programa Japan Overseas Cooperation Volunteer (JOCV) sei oferese professór voluntáriu na’in-hitu hodi hanorin edukasaun fízika ba estudante sira hahú hosi Ensinu Báziku to’o Ensinu Superiór iha Timor Leste (TL).

Embaixadór Japaun iha Timor-Leste, Kimura Tetsuya hasorum-malu ho Sekretáriu Estadu Juventude no Desportu (SEJD), Abrão Saldanha iha edifísiu SEJD, Lecidere, Kuarta (18/01/2022).

Professór voluntáriu hirak ne’e sei forma foinsa’e sira ho integradu iha dezenvolvimentu umanu, iha fíziku no Intelijénsia liuliu liga ba prátika arte marsiál.

Lee Mós: Japaun Oferese Oportunidade bá Timoroan Servisu Iha Área Indústria Agríkola

“Iha tinan ne’e governu Japonéz sei haruka voluntáriu sira mai iha Timor-Leste liu hosi kooperasaun ida hanaran JOCV. Voluntáriu na’in-hitu ne’ebé sei mai iha Timor-Leste no sei koloka ba iha eskola sira Ensinu Báziku no Universidade sira atu bele ajuda dezenvolve no hanorin edukasaun fízika ba foinsa’e sira,” Embaixadór Japaun iha Timor-Leste, Kimura Tetsuya hateten hafoin hasorum-malu ho Sekretáriu Estadu Juventude no Desportu (SEJD), Abrão Saldanha iha edifísiu SEJD, Lecidere, Kuarta (18/01/2022).

Durante enkontru, Embaixadór Japaun ne’e fahe mós esperiénsia ho SEJD kona-bá lalaok desportu no papél desportu ne’ebé halo ema sai respeitozu liu hosi pratika desportiva sira.

Parte rua mós hala’o diskusaun kle’an oinsa dezenvolve liután área oin-oin iha parte desportu no mós Juventude atu bele forma ema nia karáter liu hosi prátika desportiva sira ne’ebé iha, hodi motiva foinsa’e sira ba dezenvolvimentu integradu.

Diplomate ne’e Introdús kona-bá desportu Tayso ka Jinastiku, atu promove ka hanorin sidadaun sira kona-bá treinamentu jinastiku bá moris saudável.

Kimura Tetsuya hateten, iha Timor-Leste eziste mós arte de kombate hosi nasaun Japaun hanesan Aikodo, Karatedo, Taekwondo, Judo no mos Sorijen Kempo.

Liu hosi arte de kombate sira ne’e nia objetivu mak atu promove respeita no hakruk ba Lei tanba ne’e liu hosi kooperasaun ne’ebé iha, voluntáriu sira ba programa JOCV sei hakle’an no fahe koñesimentu ho estudante no foinsa’e sira oinsa pratika arte marsiál ne’ebé loos.

Sekretáriu Estadu Juventude no Desportu (SEJD), Abrão Saldanha hateten iha sorumutu ho Embaixadór Japaun ko’alia liu kona-bá area desportu no juventude, tamba ne’e iha marsu tinan ne’e, Embaixada Japaun sei haruka voluntáriu sira mai iha Timor-Leste atu tulun fo formasaun ba estudante no foinsa’e sira iha area edukasaun fízika no Desportu ba eskola sira.

“Iha sorumutu ne’e esplora oitoan kona-bá esperiénsia sira Japaun nian kona-bá oinsa jere arte de kombate, tamba Japaun hanesan nasaun ida boot no iha arte marsiál barak maibé sira konsege kontrola no promove sai modalidade desportiva no sai olímpiku,” nia hateten.

Nia dehan, Embaixadór ne’e fahe esperiénsia no filozofia arte marsiál katak forma ema atu moris la’ós ba oho malu.

Tamba ne’e, governu Japonêz iha mós hanoin atu tau-matan ba modalidade sira ne’ebé mai hosi Japaun no TL prátika hanesan Judo, Karatedo, Taekwondo, Judo no mos Sorijen Kempo.

Jornalista: Vito Salvadór