Governu Tau Millaun $9.3 Konstrui Edifísiu Pediatria no Unidade Kuidadu Intensivu iha HNGV

Hatutan.com, (26 Janeiru 2023), Díli- Ministériu Saúde aloka orsamentu millaun $9.3 hodi konstrui edifísiu foun bá pediatria no kuidadu intensivu iha Hospital Nasionál Guido Valadares (HNGV) atu  kria kondisaun ida di’ak hodi atende pasiente sira Pediatria nian.

Lee Mós : Pasiente Fase-Raan Tanis iha HNGV

PM Taur Matan Ruak, hatuur fatuk inan bá projetu edifísiu foun bá pediatria no kuidadu intensivu iha HNGV, Kinta (26/01/2023). Foto/Elio dos Santos da Costa

Edifísiu Pediatria no unidade kuidadu intensivu ne’ebé sei konstrui naturalmente ho nia konstrusaun fízika ne’ebé iha kompleta ho ekipamentu médiku no sala internamentu  tuir kondisaun klínika ne’ebé Ministériu  Saúde liuhosi HNGV planu atu bele atende bá kazu krítiku, liuliu bá labarik sira atu nune’e  bele redús númeru morbidade no mortalidade iha HNGV.

Ministra Saúde (MS), Odete Maria Freitas Belo, hateten ho lansamentu fatuk dahuluk bá edifísiu Pediatria no unidade kuidadu intensivu iha HNGV hanesan pasu pozitivu ida bá Ministériu Saúde.

Ministra Edete Maria Freitas Belo afirma prosesu konstrusaun bá edifísiu foun bá pediatria no kuidadu intensivu iha HNGV lori tinan naruk nia laran, dezde 2012 no ohin mak MS bele realiza konstrusaun fízika liuhosi hatuur fatuk inan iha fatin konstrusaun nian.

“Edifísiu bá Pediatria no kuidadu intensivu ne’e ho pezu andar lima, no uma halo iha rai ho luan 4300 m², sei kompleta ho kama hamutuk 327, ho orsamentu ne’ebé governu prevee hamutuk millaun $ 9.3,” Ministra Saúde Odete Maria Freitas Belo hateten, Kinta (26/01/2023).

Edifísiu foun bá pediatria no kuidadu intensivu HNGV sei presiza profisionál saúde hamutuk 81 bá too iha 163,  inklui ona médiku, enfermeiru, parteira no mós espesialista sira.

“Ministériu Saúde hahú daudaun ona ho treinamentu ka kapasitasaun atu edifísiu ne’e remata parte HNGV bele iha ona rekursu umanus sufisiente, la’ós de’it rekursu umanu maibé haree mós bá orsamentu, ekipamentu médiku inklui ai-moruk ne’ebé ospitál ida ne’e presiza,” Ministra Odete Belo hateten.

Primeiru-Ministru Taur Matan Ruak iha nia diskursu hateten, inisiativa bá konstrusaun edifísiu Pediatria no unidade kuidadu intensivu iha HNGV importante no istóriku tebes, no inisiativa ida ne’e enkuadra iha esforsu Ministériu Saúde nian, iha vizaun bá aban bairua nian.

Taur Matan Ruak afirma vizaun ida ne’e integra iha esforsu prepara planu mestre bá HNGV no ospitál Lahane, no pasu ida ne’e fundamental tebes ba esforsu atu moderniza infraestrutura saúde iha Timor-Leste.

“Ha’u hakarak parabeniza bá tékniku no profisionál sira hotu ne’ebé lakon tempu, lakon enerjia para halo projetu ida ne’e bele lansa ohin. Ha’u nia mehi no ita hotu nia mehi ida de’it, hakarak ita-nia bei-oan sira moris fali iha uma ida ne’e,  tamba tempu ona ita investe iha ita-nia saúde,” Primeiru-Ministru Taur Matan Ruak hateten.

Xefe Governu hatutan Ministériu Finansas tenke kontinua mobiliza rekursu  finanseiru para Ministériu Saúde no HNGV atu projetu sira ne’ebé prioridade tuir pontu devista tékniku liu-liu rekomendasaun sira husi Diretór Jerál HNGV no médiku sira nian bele implementa atu bele hatudu hakat ida ba oin.

Konstrusaun edifísiu Pediatria no unidade kuidadu intensivu ne’e hanesan projetu boot ba Ministériu Saúde maibé mós hanesan traballu da Kaza atu hahú agora no tenke la’o bá oin no finaliza.

Taur Matan Ruak husu atu empreza konstrutór tenke kumpre prazu ba konstrusaun no liu-liu kumpre mós kualidade ne’ebé ezije ba infraestrutura ida-ne’e.

Edifísiu Pediatria no kuidadu intensivu iha HNGV ne’e ho pezu andar lima ne’e konstrui hosi empreza Cina Civíl Engineering  Construction Coorporation (CCECC).

Jornalista: Vito Salvadór