“Fundus ne’ebé SEJD sei oferese ba arte marsiál sira ne’e kobre komponente lima importante mak hanesan apoiu jestaun sekretariadu organizasaun nian, resensiamentu ba membru, formasaun ba treinadór sira, realiza kompetisaun interná kada organizasaun no konstrusaun sede,” Prezidente KRAM, Fernando da Costa hateten iha Salaun enkontru SEJD, Lecidere, Segunda (30/01/2023).
Advertisement
Organizasaun arte marsiais no arte marsiais federativa 18 mak hetan apoiu hosi SEJD kompostu hosi Persaudaraan Setia Hati Terate (PSHT), Ikatan Keluarga Sakti Panca Silat Timor-Leste (IKS-PTL), Persai Diri (PD), Kmanek Oan Rai Klaran (KORK), Kunfu Master, Pedjajaran, Serulin Dewata, Aikido, sira seluk inklui federasaun arte marsiál hanesan Taekwondo, Federasaun Karatedo, Federasaun Silat no mos Boxing.
Osan ne’e sei atribui depende ba membru ne’ebé organizasaun arte marsiais sira iha, balun ne’ebé iha membru barak no iha komplesidade ne’ebé boot, sira nia osan tuir ida ne’e.
Estimasaun SEJD nia ne’e katak, organizasaun sira ne’ebé boot liu sei hetan $300.000 no ki’ik liu sei hetan $60.000-resin.
Kona-bá osan atu harii sede ba organizasaun arte marsiais sira ne’e komponente ida de’it hosi totál orsamentu ne’ebé governu preve ona.
Tanba ne’e, molok ba to’o iha konstrusaun sede, organizasaun arte marsiais sira tenke iha uluk jestaun ida ne’ebé di’ak.
Advertisement
Orasamentu ne’ebé governu sei aloka ba organizasaun arte marsiais sira ho objetivu atu bele tulun mos sira halo jestaun no iha formasaun interna ba membru sira atu bele kapasita no sosializa hodi forma membru sira tuir doutrina arte marsiais nian ne’ebé hadomi pás no afavór ba dezenvolvimentu nasionál.
Kona-bá atu harii edifísiu ba organizasaun arte marsiais sira, estatutu rai mós importante tanba ne’e presiza haree no iha identifikasaun molok halo sede atu bele hatetene loloos katak rai ne’ebé atu harii sede ne’e organizasaun nia rai ka se nian nune’e labele iha disputa.
Bainhira membru arte marsiál sira ne’ebé komete krime sei prosesa tuir lei ne’ebé vigora no autoridade seguransa mak sei halo atuasaun direta.
Maibé, bainhira iha membru organizasaun arte marsiais sira mak komete erru ka halo problema iha fatin formasaun ka klubu ruma, KRAM iha autoridade atu halo intervensaun hanesan bele hasai lisensa ka la autoriza sira halo formasaun bazeia ba konkordánsia ruma.
Prezidente PSHT, Baltazar Lemos Seisas hateten, kona-bá fundu apoiu ba organizasaun arte marsiais parte PSHT la hare ba nia montante bo’ot ka ki’ik, importante maka governu iha ona inisiativa atu apoiu organizasaun arte marsiais tanba ne’e prontu koopera.
Advertisement
Oras ne’e PSHT iha ona faze halo resensiamentu ba membru sira ho totál provizóriu i20.000 no PSHT sei kontinua halo resensiamentu nune’e bele finaliza no entega ba KRAM.
Prezidente IKS-PTL, Silvestre Sufa hateten, fundus ne’ebé governu sei fó ba organizasaun arte marsiais sira ne’e di’ak tanba bele tulun dezenvolvimentu organizasaun.
Apela ba membru sira atu mantein disiplina no halo tuir regra sira ne’ebé hatur iha organizasaun IKS-PTL nune’e labele prezudika ema seluk ka organizasaun seluk.
Oras ne’e IKS-PTL rejista ona membru 25.000 no sei kontinua halo resensiamentu atu bele hatene totál membru ne’ebé iha.