Hatutan.com, (01 Fevereiru 2023), Díli- Vise-Ministru Negósiu Estranjeiru no Kooperasaun (V-MNEK), Julião da Silva, Kuarta (01/02/2023), informa, insidente membru delegasaun Vise-MNEK nian ne’ebé hetan baku iha festa natal hamutuk ho komunidade Xina-Timoroan iha Darwin-Austrália rezolvidu no taka ona tanba parte sira ne’ebé envolve iha agresaun fíziku tempu ne’ebá ho kondisaun lanu.
Vise-MNEK Julião da Silva. Foto/Elio dos Santos da Costa
Vise-MNEK Julião da Silva bá jornalista sira iha Palásiu Governu, informa, kazu nia membru delegasaun ne’ebé hetan baku iha festa natal hamutuk iha Darwin-Austrália tamba deskonfia halo asédiu seksuál taka no laiha prosesu investigasaun kontinuasaun tamba konsidera ne’e dezentendimentu entre joven sira tamba lanu no la’ós problema sériu.
“Ha’u hanoin laiha investigasaun no prosesu ida mak iha, ne’e ema bolu dehan dezentendimentu entre joven sira iha ne’ebé de’it. Parte sira lanu hotu no laiha kazu boot no ha’u informa ona bá Prezidente Repúblika iha semana rua bá kotuk. Ha’u hanoin ne’e la’ós krime boot ida mak ita halo iha Austrália no ne’e dezentendimentu joven sira de’it,” Vise-Ministru Negósiu Estranjeiru no Kooperasaun Julião da Silva hateten.
Advertisement
Nia afirma katak insidente ki’ik ne’e la’ós kestaun estraga imajen Timor-Leste nian iha rai seluk, tanba dezentendimentu ne’e iha festa la’ós iha diskursu formal ruma ne’ebé ba ko’alia hodi estadu nia naran.
“Laos kestaun estraga imajen Timor nian, ita bá la’ós tamba ita halo diskursu ida bé ita ko’alia mak akontese buat sira ne’e,” Julião da Silva esplika.