FFTL Transfere $50,000.00 bá LFTL Organiza Liga Timorense Époka 2022-2023

Hatutan.com, (11 Fevereiru 2023), Díli- Diretór Relasaun Públika Liga Futeból Timor-Leste (LFTL), Diego Neto Fraga,  informa Órgaun Liga Timorense simu ona subsídiu hosi Federasaun Futeból Timor-Leste (FFTL) ho montante $50,000.00 atu bele organiza liga Timorense époka 2022-2023 .

Lee Mós : LFTL “Laran Susar” Tanba FFTL Seidauk Transfere Subsídiu Hosi Governu

Diretór Relasaun Públika Liga Futeból Timor-Leste (LFTL), Diego Neto Fraga. Foto/Elio dos Santos da Costa

Diego Neto Fraga hateten, iha loron rua bá kotuk FFTL halo ona transferénsia orsamentu bá órgaun liga la’ós tuir akordu ne’ebé parte rua iha hanesan uluk katak bá faze dahuluk ho montante portsentu 40 hafoin ida ne’e kompleta porsentu 60 iha faze ikus, maibé transfere ona osan bá konta LFTL nian tuir proposta ne’ebé LFTL submete bá FFTL ho montante $50,000.00.

LFTL no FFTL hamutuk ho klube sira primeira no segundu divizaun iha ona konkordánsia no iha teknical meeting laiha problema no kick off liga Timorense époka 2022-2023 sei hahú iha loron 17 fulan-Fevereiru, maibé agora klube sira sei enfrenta problema ho finansial support ne’ebé kabe bá iha FFTL nia kompeténsia.

Tuir konkordánsia  ne’ebé iha entre klube sira, FFTL no LFTL inklui SEJD iha, katak klube sira segunda divizaun sei simu finansial support ho montante $10,000.00 no klube primeira divizaun ho montante $20,000.00.

Adjuntu Sekretáriu Jerál FFTL, Frederico Martins hateten, bainhira iha ona serteza katak liga Timorense époka 2022-2023 atu realiza, parte FFTL halo ona anúnsiu no komunika ona ho klube sira oinsá atu submete sira nia proposta gastu bá iha orsamentu klube nian.

Adjuntu Sekretáriu Jerál FFTL, Frederico Martins. Foto/Elio dos Santos da Costa

FFTL fó ona kalendarizasaun bá klube sira, kona-bá data submisaun orsamentu hosi klube sira, atu nune’e, molok kick off liga Timorense époka ne’e,  FFTL bele halo ona transferénsia financial support bá klube sira.

“Too agora ita hosi parte FFTL seidauk halo transferénsia osan ruma bá konta bankária klube sira nian tamba ita seidauk simu pedidu hosi klube sira, iha akordu ho klube sira ba faze dahuluk FFTL sei fó porsentu 40 tamba ne’e la’o pakote tamba ne’e klube hotu tenke submete pedidu foin halo transferénsia dala ida, no kona-bá segunda faze nian porsentu 60  depende klube ne’ebé mak hatama uluk sei simu uluk,” Frederico Martins esplika.

Klube ne’ebé hatama ona pedidu orsamentu bá FFTL mak hanesan Ponta Leste FC no Lica-Lica Lemorai FC, enkuantu klube sira seluk sei submete iha tempu tuir mai atu bele hetan direitu ba finansial support hodi intensiva klube durante jogus sira iha liga Timorense époka 2022-2023.

Jornalista: Vito Salvadór