Emprezáriu Timoroan Ida Apoiu Na’an Karau, Foos ho Osan bá Kantina Matak Palásiu Prezidensiál

Hatutan.com, (17 Fevereiru 2023), Díli- Palásiu Prezidensiál apresia no orgullu ho inisiativa karidade hosi emprezáriu timoroan ida ne’ebé fó apoiu karau ida ho nesesidade báziku seluk tan bá kantina matak Palásiu Prezidensiál, Sesta (17/2/2023).

Lee Mós : Prezidente Repúblika Hahú Implementa Programa Kombate Mánutrisaun

Apoiu hosi emprezariu Timoroan ida bá Kantina Matak Palásiu Prezidensiál, Sesta (17/2/2023). Foto/Elio dos Santos da Costa

Emprezáriu Timoroan ida ne’ebé husu rasik bá mídia no jornalista sira atu la bele publika nia identidade ne’e    ho inisiativa rasik kontribui karau ida (ne’ebé oho tiha ona)  foos morin karól 10, fehuk roupa, mina te’in ho mós osan ho montante $500.00 oferese bá kantina matak Palásiu Prezidensiál atu tulun programa nutrisaun no fornese hahán saudavel ba labarik ho inan isin-rua sira ne’ebé Prezidente Repúblika José Ramos-Horta inisia no estabelese.

Koordenadóra Programa Prezidente Repúblika nian bá apoiu povu, Bella Galhos hateten,  apoiu ne’ebé emprezáriu Timoroan ida ne’e  oferese ne’e sei bele tulun labarik sira ne’ebé vulnerável atu bele hetan mós aihan nutritivu natoon no bá inan sira ne’ebé moris mesak no inan isin-rua sira bele asesu bá aihan saudável kada loron.

“Ita nia emprezáriu ne’e (lakohi temi nia naran) iha kompromisu atu apoiu programa nutrisaun Prezidensia Repúblika nian no apoiu ida-ne’e sei halo kada fulan, ohin, bele karau no fulan oin bele manu, bele mós ikan no hahán nutritivu sira seluk,” Koordenadór Kantina Matak Bella Galhos bá jornalista sira  hafoin simu karidade  hosi emprezáriu timoroan ne’e.

Koordenadora ne’e hatutan apoiu ida-ne’e emprezáriu Timoroan  ne’e halo ho laran no nia rasik husu atu labele publika nia identidade, maibé  Kantina Matak hola inisiativa atu hateten sai bá públiku hodi inspira maluk sira seluk atu bele mós apoiu inisiativa Prezidente Repúblika nian no bele mós replika bá iha fatin sira seluk hodi fó han bá labarik sira no família liuliu inan isin-rua sira ne’ebé vulnerável iha munisípiu sira ne’ebé númeru mánutrisaun as.

Apoiu hosi emprezariu Timoroan ida bá Kantina Matak Palásiu Prezidensiál, Sesta (17/2/2023). Foto/Elio dos Santos da Costa

“Ita espera katak ho asaun ne’ebé emprezáriu timoroan ne’e  halo ne’e bele inspira emprezáriu timoroan sira seluk hodi hauidu katak ita Timoroan sira bele lolo-liman ba malu hodi hadi’a nutrisaun povu kiik nian liuhosi asaun karitativa ne’ebé iha tuir kbiit ema ida-idak nian,” Bella Galhos hateten.

Bella Galhos sublina programa hadia nutrisaun bá labarik no inan isin-rua sira iha kantina matak sai hanesan programa ida prioridade no importante ba Xefe Estadu tanba  hakarak haree povu ki’ik sira iha asesu bá aihan diak no saudável bá saúde.

Jornalista: Vito Salvadór