Hatutan.com, (20 Fevereiru 2023), Díli—Governu Korea liuhosi Korea International Cooperation Agency (KOICA), sei oferese millaun $6, hodi fó resposta bá moras infesioza ka moras hada’et lalais iha Timor-Leste (TL).
Tanba ne’e, iha Segunda 20 fevereiru, Governu liuhosi Konsellu Ministru (KM) delibera, ho projetu ne’ebé aprezenta hosi Ministru Finansas (MF) Rui Gomes, atu aprova akordu Projetu entre Repúblika Demokrátika Timor-Leste (RDTL) ho Ajénsia Kooperasaun Internasionál Koreia Súl (KOICA).
Lee Mós: KOICA Apoia Millaun $5 Bá Implementasaun Projetu Rede Hanorin Istória
Akordu ne’e, kona-bá projetu “Strenghtening the Preparedness and Response to Infectious Disease in Timor-Leste” ka Fortalesimentu Preparasaun no Resposta ba Moras Infesioza sira iha Timor-Leste.
Konsellu Ministru delibera ona mós atu dezigna Ministru Finansas atu reprezenta Governu Timor-Leste, hodi asina akordu ne’e.
“Tuir akordu ida-ne’e, KOICA kompromete atu halo kontribuisaun finanseira ida ho montante millaun $6, ne’ebé sei utiliza atu hametin preparasaun no resposta ba moras infesioza iha Timor-Leste, liu hosi reforsu kapasidade atu deteta, notifika no hatán iha nível hotu-hotu, tuir tempu ne’ebé loloos ba eventu no surtu sira moras infesioza prioritária sira nian, nune’e mós liu hosi preparasaun hosi espesialista nasionál sira ba área ida-ne’e,” Hatutan.com sita komunikadu.
Governu hakarak ho deliberasaun ida-ne’e atu mobiliza asisténsia finaseira nesesária, iha forma empréstimu ho objetivu atu hametin infraestutura saúde nune’e mós sistema referénsia entre unidade saúde munisipál no iha sentru ospitalár sira.
Jornalista: Rogério Pereira Cárceres
