Prezidénsia Repúblika Tulun Família Vulnerável Iha Viqueque, Defisiente Joaninha Husu Uma

Hatutan.com, (24 Fevereiru 2023), Díli—Prezidénsia Repúblika (PR), liu hosi gabinete apoiu sosiedade sivíl kontinua fó apoiu bá komunidade vulnerável liuliu família ho kondisaun defisiente iha munisípiu Viqueque.

Prezidénsia Repúblika, José Ramos-Horta, Kinta-Feira (23/02/2023), fó apoiu umanitáriu bá inan-faluk ho nia oan na’in-tolu ne’ebé sofre defisiénsia fízika no mentál. Foto/Média PR.

Prezidénsia Repúblika apoia ne’e hafoin akompaña sidadaun balun públika kondisaun moris ema ho defisiénsia hirak ne’e iha  média sosiál.

Lee Mós: Komunidade Afetadu Inundasaun 04 Abril iha Laclo Simu Nesesidade Bázika Hosi Prezidénsia Repúblika

Família ho kondisaun defisiénsia fízika no mentál ne’e kompostu hosi inan-faluk ho oan na’in-tolu iha Suku Makadiki, Postu-Administrativu Watulari, Munisípiu Viqueque.

“Xefe Estadu iha fulan ida liu bá, haree iha média sosiál, nune’e haruka ami mai observa kondisaun moris família ida-ne’e nian. Ami lori mós apoiu umanitáriu balun hosi Prezidente Ramos-Horta. La promete, maibé sei relata ba Prezidente Repúblika no ba oin, apoia saida mak bele halo-tán ba família liu-liu maun-alin ema ho difisiénsia na’in-tolu ne’e,” Assesór ba Assuntu Sosiedade Sivíl no apoiu Sosiál, Quintiliano Moníz Carvalho hateten iha komunikadu, Sesta (24/02/2023).

Reprezentante Família difisiénsia, Luis Ximenes agradese bá Prezidente Repúblika ne’ebé tulun ona família ne’e no mai to’o kedan fatin ne’e.

“Ami iha na’in-ualu, feto tolu ne’ebé forma ona família, mane na’in-haat, ha’u nia kondisaun mak di’ák, na’in-tolu seluk difisiénsia. Hanesan maun bo’ot ha’u forsa la to’o atu halo uma ba sira. Husu atu se bele halo uma ba sira na’in-tolu,” Luis Ximenes husu ajuda.

Luis Ximenes mós husu ba Prezidénsia Repúblika atu ajuda mákina dulas nú, nune’e hafásil nia atu buka osan, hodi bele haree nia família no alin na’in-tolu.

Luis Ximenes nia maun-alin ho difisiénsia fízika no mentál mak hanesan Bernandino da Silva, Clementino Pinto, Cipriano Pinto ho idade liu ona 25.

Durante ne’e nia inan Rofina Monteiro ho idade 70-resin mak tau-matan ba na’in-tolu ho nia maun bo’ot Luís Ximenes ne’ebé buka hela servisu iha vila.

Ajudu ne’ebé Prezidente Repúblika oferese hanesan ai-han, sasan toba no apoiu seluk ne’ebé oferese rasik hosi Xefe Estadu, José Ramos-Horta.

Joaninha Sarmento Husu Uma bá Prezidente Repúblika

Prezidénsia Repúblika, José Ramos-Horta, Kinta-Feira (23/02/2023), fó apoiu umanitáriu bá inan-faluk ho nia oan na’in-tolu ne’ebé sofre defisiénsia fízika no mentál. Foto/Média PR.

Xefe Estadu fó mós apoiu ba difisiénsia fízika seluk ho naran Joaninha Sarmento ne’ebé hela iha aldeia Kaitahu, Suku Afaloicai, Postu Administrativu Watulari, Munisípiu Viqueque.

Joaninha Sarmento ho kondisaun difisiénsia fízika simu apoiu hosi Prezidente Repúblika ho matan-been ksolok nian tanba Xefe Estadu bele orienta nia gabinete apoiu sosiedade sivil no apoiu sosiál ba to’o iha nia hela fatin.

Joaninha Sarmento agradese ba Prezidente Repúblika Ramos-Horta ne’ebé buka-tuir to’o iha ne’e, agaredese tebes ba fuan boot.

“Oan ha’u hakarak husu ajuda halo uma ida. Ha’u hakarak tu’ur ketak, moris mai terus to’o agora. Hela ho maun ne’ebé iha oan-barak, buka meius hotu, hodi ajuda mós maun to’o debe no fa’an sasan balun hodi ajuda lisuk maun ho nia-oan sira nia eskola,” Joaninha Sarmento hateten ho matan-been.

Prezidénsia Repúblika apoia mós kadeira-roda no nesesidade bázika ba difisiésia fízika Joaninha Sarmento ne’ebé ho idade 40-resin no apoiu ne’e entrega direta hosi Assesór Sosiedade Sivíl no Apoiu Sosiál Quintiliano Moníz de Carvalho.

“Ami rua oan-ki’ak, inan-aman mate hotu ona. Ami sempre apoia-malu. Dezembru 2022, ha’u la konsege simu osan $200 tanba sira dehan ha’u hetan ona subsídiu sosiál kada fulan 6, nune’e ha’u sempre buka meius atu hasoru Prezidente Repúblika hodi hato’o ha’u nia susar,” Joaninha hateten.

Assesór Quintiliano Moníz hateten, Xefe Estadu hakarak tulun família sira ne’ebé presiza duni tulun, tuir kbi’it, liu-liu feto no ema ho defisiénsia.

Jornalista: Vito Salvadór