“APC hakarak informa ba públiku katak, ita sei halo teste alarma sedu ba Tsunami Warning System. Tanba ne’e, husu komunidade atu labele pániku durante halo teste,” Hatutan.com sita deklarasaun Anacleto Caetano iha komunikadu.
Sirene iha rua ne’ebé instaladu iha área Largo Bidau Lecidere no ida seluk iha área Aeroporto Internasionál Nicolau Lobato Comoro.
Sistema alerta sedu ne’e, hetan apoiu hosi Komunidade Pasífiku nia sekretariadu (SPC) iha tinan 2016 ho objetivu atu fó alarma bainhira mosu rai nakdoko no mosu tsumani.
Durante ne’e, mosu rai nakdoko maibé sistema ne’e la fó alarma tanba la funsiona, no agora daudaun tékniku sira hosi empreza Arfat halo ona manutesaun no funsiona hikas ona.