PDRT ho APMT Estabelese Koligasaun Pré-eleitoral

Hatutan.com, (04 Marsu 2023), Díli- Partidu Demokrátiku Repúblika Timor-Leste (PDRT) ho Partidu Asosiasaun Populár Monarkia Timorense (APMT), Sábadu (4/3/2023), ofisiálmente estabelese koligasaun pré-eleitoral hodi kompete iha eleisaun parlamentár 2023.

Lee Mós : Partidu Haat Deklara Koligasaun Frente Ampla Demokrátika

Prezidente PDRT, Agostinho Gomes. Foto/Elio dos Santos da Costa

Prezidente Partidu PDRT, Agostinho Gomes hateten, PDRT  ho APMT deside tuur hamutuk liuhosi konferénsia nasionál atu hamutuk enfrenta dezafiu sira iha prosesu eleitorál bá eleisaun parlamentár nian ne’ebé tuir kalendáriu sei akontese iha loron 21 fulan-Maiu, tinan ne’e.

Iha konferénsia nasionál PDRT ho APMT hahú diskute ezbosu  sira koligasaun nian, liu-liu estatutu koligasaun nian ne’ebé sei sai hanesan regulamentu interna koligasaun nian hodi regula partidu koligasaun bainhira hetan konfiansa hosi povu hodi bá kaer ukun iha Governu no tuur iha Parlamentu Nasionál.

“Ami garante no iha konviksaun atu hetan asentu iha eleisaun parlamentár tamba ne’e ami forma koligasaun,” Agostinho Gomes hateten bá jornalista sira iha salaun CNE, Caicoli, Díli.

Koligasaun pré-eleitoral ne’ebé iha entre PDRT no APMT ho esperansa atu hetan kadeira haat (4) iha eleisaun parlamentár mai tamba kuadru partidu rua iha baze hahú servisu no halo esforsu hotu atu hetan asentu iha Parlamentu Nasionál.

Iha fatin hanesan prezidente  APMT, Pedro da Costa Ramalho hateten, PDRT ho APMT la’ós foin mak hanoin atu halo koligasaun, maibé desde uluk kedas APMT moris iha Portugál iha 1946 no mai iha Timor-Leste desde 1985 PDRT ho APMT halo ona koligasaun liuhosi kustume ne’ebé iha hodi apoiu luta bá Timor-Leste nia independénsia.

Partidu koligasaun PDRT ho APMT. Foto/Elio dos Santos da Costa

“Ami mai hamutuk ho PDRT tamba iha hanoin hanesan oinsa uza kustume no lisan hamutuk ho tradisaun hotu dezenvol Timor-Leste,” Pedro da Costa Ramalho hateten.

Tuir ajenda koligasaun entre partidu PDRT ho APMT sei lori bá rejistu  iha Tribunál Rekursu hodi hetan legalidade jurídika atu bele partisipa iha eleisaun parlamentár 2023 hanesan partidu koligasaun.

Jornalista: Vito Salvadór