Azerbaijaun Hakarak Partisipa iha Investimentu Dada Pipeline Greater Sunrise Mai Timor-Leste

Hatutan.com, (12 Marsu 2023), Díli- Azerbaijaun hakarak  atu partisipa iha investimentu dada pipeline husi greater sunrise mai rai maran iha Timor-Leste no sei kontinua halo estudu atu investe mos iha setór turizmu no hotelaria.

Lee Mós : Ramos-Horta ho Primeiru-Ministru Kosovo Diskute Kooperasaun Iha Futuru

Vontade Azerbaijaun nian ne’e hato’o direitamente hosi Xefe Governu ho Xefe Estadu Azerbaijaun,  Ilham Aliyev bainhira hasoru malu ho Prezidente Repúblika, José Ramos-Horta durante vizita Xefe Estadu Timo-Leste nian ne’e iha Azerbaijaun.

Xefe Estadu Azerbaijaun, Ilham Aliyev  fó kedas instrusaun bá nia Embaixadór iha Jakarta, atu iha tempu badak mai Timor-Leste atu haree hodi ko’alia  no buka relasaun bilaterál no kooperasaun atu hanoin haree  posibilidade investimentu ruma hosi Azerbaijaun mai Timor-Leste.

Prezidente Repúblika, José Ramos-Horta, to’o fali iha Timor-Leste, Domingu (12/3/2023). Foto/GPR

“Buat ne’ebé há’u hanesan Xefe Estadu esplika bá sira katak Timor Leste interesadu liu mak atu dada pipeline hosi greater sunrise mai rai maran Timor-Leste, no governu interesadu atu buka investidór atu partisipa iha investimentu ida ne’ebé boot hodi dada pipeline no Azerbaijaun  tau konsiderasaun bá ida-ne’e no sei explora posibilidade sira liuhosi estudu ne’ebé sei halo iha Timor-Leste,” Prezidente Repúblika José Ramos-Horta hateten  bá jornalista sira hafoin too fali iha Timor-Leste  iha aeroportu Internasionál Prezidente Nicolau Lobato, Díli, Domingu  (12/03/2023).

Xefe Estadu hatutan Azerbaijaun iha kompromisu no hakarak atu investe iha Timor-Leste maibé sei haree no estuda posibilidade hotu atu bele hahú investimentu iha Timor-Leste.

Ramos-Horta mós informa bá Azerbaijaun katak Timor-Leste atu tama bá ASEAN no presiza investimentu liután iha área turizmu atu konstrusaun otél, tanba bainhira Timor Leste tama ASEAN sei presiza otel ho nível barak liután no mós sentru konvensaun no liña aero sira no turizmu.

“Azerbaijaun interesadu atu halo investimentu iha nasaun seluk tanba sira iha fundu soberanu ida no halo aplikasaun bá fundu soberanu ne’e hodi halo investigasaun iha li’ur tanba ne’e sira bele mai haree estuda situasaun iha Timor-Leste no sei halo desizaun,” Ramos-Horta subliña.

Xefe Estadu informa mós kona-bá viajen estadu no partisipasaun iha Simeira mundial Least Development Country (LDC) mundiál, ne’ebé konvite mai hosi Sekretáriu Jerál ONU, hamutuk ho liurai boot Qatar nian.

Rai lubuk ida mak partisipa no tema ne’ebé ko’alia iha simeira ne’e kona-bá problema sosiál no ekonomia, rai sira ne’ebé hanaran LDC ne’ebé Timor-Leste hola parte mós.

Iha segundu viajen partisipa iha forum polítiku diplomátika, akadémiku ne’ebé hanaran “Baku globál forum” ne’ebé patrocina hosi instituisaun barabarak liuliu nasaun Azerbaijaun hanesan nasaun ne’ebé riku tebetebes ho mina no nasaun dahuluk iha mundu ne’ebé halo esplorasaun bá mina iha tinan 100 ida liubá.

“Rezultadu husi partisipasaun Timor-Leste nian iha LDC ita espera rezultadu imediatu tanba Sekretáriu Jerál ONU nia intensaun atu reuniaun ida ne’e bele dada atensaun mundu liuliu país riku sira bá rai sira LDC ne’ebé hetan impaktu husi pandémia Covid-19 no guerra Ukránia-Rúsia tanba iha tinan 10 ba kotuk situasaun ekonomia nasaun barak iha mundu ne’ebé afeita la’ós rai sira ne’ebé LDC de’it, maibé mós bá nasaun sira liu tiha LDC mós hetan problema barak, liuliu problema ekonomia, finanseiru, no investimentu,” Ramos-Horta informa.

Hanesan konferénsia hotu-hotu, la’ós bá ko’alia de’it iha reuniaun sira maibé halo mós enkontru bilaterál sira hodi up-date kona-bá situasaun Timor Leste iha ne’ebé nasaun hotu-hotu haree no rona, situasaun iha Timor-Leste pozitivu, rekuperasaun ekonomia la’o kapás, situasaun kontinua la’o di’ak nasaun moris iha demokrasia nia laran, dame, seguransa, no ne’e mak komunidade internasionál kontente.

Krize mundiál barak mós hahú husi Ukránia no Rúsia, Afeganistaun, Yemen, Síria, to’o Líbia kontinua problema no tensaun entre nasaun sira kontinua sa’e, maibé Timor-Leste kontinua hela iha hakmatek nia laran hanesan oáse trankuilidade.

Jornalista: Vito Salvadór