Governu Mantein José Ximenes bá Komisáriu CAC

Hatutan.com, (17 Marsu 2023), Díli- Ministru Prezidénsia Konsellu Ministru (MPCM, sigla portugés), Fidélis Leite Magalhães,  hateten governu nafatin mantein ho José Ximenes bá komisáriu Komisaun Anti Korrupsaun (CAC, sigla portugés) tamba ne’e ba bankada parlamentár ne’ebé konkorda aprova no se lakonkorda vota kontra tamba desizaun sira ne’e mak sei determina desizaun Governu nian tuir mai.

Lee Mós : Governu Presiza Haree Komisáriu CAC Foun Ne’ebé Bele iha Konsensu Bankada Parlamentár

Ministru Fidelis Leite Magalhães hateten, Governu nia pozisaun mak hato’o tiha ona bá Parlamentu Nasionál liuhosi kandidatura úniku bá Komisáriu  CAC mak antigu Prokuradór Jerál Repúblika no atual Asesór Prinsipál iha Gabinete Primeiru-Ministru, José Ximenes.

José Ximenes. Foto/ Média GPM

“Se karik iha Parlamentu Nasionál, deputadu sira maioria vota kontra kandidatu Governu nia mak Governu obrigadu tenke nomeia fali kandidatu foun, maibé seidauk to’o ne’ebá ami sei hein. Ne’e kompetensia Parlamentu Nasionál nian tanba Konstituisaun hatur klaru ona kona-bá kompeténsia Parlamentu Nasionál no Governu nian, maibé iha kazu ne’e lei ko’alia klaru katak Governu  propoin maibe votasaun bá kandidatu ne’e kompeténsia Parlamentu Nasional nian,” Ministru Fidélis Leite Magalhães bá jornalista sira iha Ministériu Finansas, Díli, Sesta (17/03/2023).

Governante ne’e hatutan, desizaun bá komisáriu CAC foun hodi troka komisáriu CAC, Sérgio Hornai tenke hein desizaun Parlamentu Nasionál tanba parte Governu nian halo tiha ona nia kompetensia tuir lei haruka.

Kona-bá bankada oposizaun sira la konkorda ho kandidatu ne’e,  Fidélis Magalhães, labele komenta polítika parlamentar, no bele bá husu ba deputadu sira iha Parlamentu Nasional.

Governante ne’e subliña, desizaun ne’e iha Parlamentu Nasionál no b ainhira sei iha prosesu nia laran no seidauk hakat bá eleisaun hodi hatene katak liu ka laliu mak haruka fali ona mai Governu atu deside antisipadamente ne’e la tuir fali ona buat ne’ebé lei haruka.

Lee Mós : Hili Komisáriu CAC Foun Presiza Konsensu Bankada Parlamentár

Jornalista: Vit Salvadór