Pilotu Ida-Ne’e Mak Lori Aviaun Timor Oan Nian

Hatutan.com, (20 Marsu 2023), Díli—Pilotu ne’ebé lori aviaun Timor Oan nian ho marka Airbus A320 ne’ebé sei semo hosi Timor Leste bá mundu, ninia naran maka Kapitaun Adnan Baang, moris iha Makassar-Indonézia, 15 Abríl 1972.

Pilotu ne’ebé lori aviaun Komersiál Timor Oan nian ho marka Airbus A320, Kapitaun Adnan Baang. Foto/Hatutan.com.

Oras-ne’e daudaun Kapitaun Adnan Baang hela permanente iha Modernland Cluster La Valetta LV7/No.02 RT 002 RW 006 Kelapa Indah, Tangerang-Indonézia.

Lee Mós: Aviaun Timor Oan Nian Tun Iha Díli, Ministru José Agostinho Hamonu Matan-Been Orgullu Nian

Kapitaun Adnan Baang ne’ebé ho relijiaun Musulmana ne’e gosta halimar Soccer, gosta lee, gosta rona múzika no halo viajen.

Iha tinan 1985, Kapitaun Adnan Baang hahú estudu primária iha SDN Mangkura Makassar, Ensinu Pré Sekundáriu iha SMP PGRI Makassar iha tinan 1988.

Iha tinan 1991 tama bá eskola Sekundáriu iha SMAN 11 Makassar  no kontinua bá Eskola pilotu nian iha  Navair International Flying School Sydney, Australia iha Outubru tinan 1993  no to’o Outubru 1994 semo ona oras 331,54.

Nia iha ona esperiénsia serbisu hahú hosi fulan Jullu tinan 1996 to’o Agostu tinan 2004 serbisu iha komapañia PT. Merpati Nusantara Airlines no oras semo Turbo Prop 946 Hrs CN 235, Turbo Prop 1273,06 Hrs F- 27 / 500 2.

Iha Setembru 2004 to’o fulan Marsu tinan 2009 serbisu iha kompañia PT. Lion Air Myanmar Airways (charter Flight) ho nia oras semo Jet 3954,41 Hrs MD 82/ 83 and MD 90 3.

Iha Abríl tinan 2009 to’o fulan Setembru tinan 2012 serbisu iha kompañia PT. Citilink Flying ho nia oras semo Jet 2781,08 Hrs Boeing 737 300/400/500 4.

Desde fulan Novembru tinan 2012 to’o fulan Marsu tinan 2013 serbisu iha kompañia PT. Sriwijaya & PT. Sky (Freelance) ho nia oras semo Jet 300 Hrs Boeing 737 400/500 5.

Hahú fulan Janeiru tinan 2014 to’o fulan Janeiru  tinan 2016 serbisu iha kompañia PT. Ersa Eastern Aviation ho nia oras semo Jet 348,05 Hrs EMB 505 Phenom 300 Chief Pilot.

Iha fulan Agostu tinan 2016 to’o fulan Abril tinan 2017 Serbisu iha kompañia PT. Batik Air ho nia oras semo Jet 532,10 Hrs A320 7.

Iha fulan Maiu tinan 2017 to’o fulan Marsu 2020 (unpaid leave due to Covid-19) serbisu iha kompañia Sky Angkor Airlines, Cambodia Flying Hours : Jet 2513,29 Hrs A320/321 8.

Iha fulan Abril tinan 2020 to’o agora serbisu Freelance hanesan Kapitaun A320 hanesan pilotu komandu  A320/321 ho nia oras semo Jet Engines 10429,33 Hrs Turbo Prop 2551 Hrs.

Ninia totál oras semo to’o ona 12980,33 Hrs ho nia esperiénsia semo ona bá Austrália, India, Malázia, Singapore, Myanmar, Thailándia, Vietname, Xina, Korea du Súl, Macau, Hong-Kong, Filipina, Palau Island, Kambódia no Indonézia.

Kapitaun Adnan Baang ne’ebé ho esperiénsia barak iha área aviasaun nian, fó ninia razaun hodi hili liu atu lori aviaun Timor Oan nian tanba nia iha misaun ida hakarak atu dezenvolve Aero Dili sai empreza ne’ebé di’ak liu no sussesu iha Díli no mós bele naran boot iha mundu.

“Ha’u hili hodi lori aviaun foun Timor Leste nian tanba ha’u rasik iha mehi boot ho ha’u nia esperiénsia desde tinan 1996 iha aviasaun nian, hakarak atu fahe matentek ba ha’u nia maun alin Timor oan sira kona-bá área aviasaun nian. Tanba ne’e ida ne’e sai mós hanesan obstákulu ida maibé interresante ba ha’u atu halo duni ida-ne’e. Ha’u hakarak atu ema iha mundu hatene kona-bá Dili ne’ebé iha mós ninia aviaun rasik ho Bandeira RDTL no tun iha ema seluk nia nasaun. Ida-ne’e mak halo ha’u orgullu tebes bainhira lori aviaun ne’e semo ba ema seluk nia rain,”  Adnan Baang hateten ba Hatutan.com iha Aeroportu Internasionál Prezidente Soekarno Hatta, Cenkareng, Jakarta, Domingu (19/03/2023).

Hanesan ema umanu, Kapitaun Adnan Baang mós konta katak, bainhira semo iha kalohan leten sente tauk, maibé buat hotu sempre preparadu iha fíziku no mentál atu enfrenta kualkér situasaun tanba durante formasaun atu sai pilotu hetan formasaun kompletu no treinadu.

“Bainhira akontese buat ruma, ita hakmatek nafatin tanba ita hetan ona buka’e no formasaun kona-bá ida-ne’e,” nia hateten.

Problema ne’ebé dalaruma hasoru iha aviaun nian bainhira semo iha kalohan leten, Kapitaun Adnan Baang dehan, dalaruma akontese anin boot derrepente ne’ebé la espera.

Alende ne’e dalaruma mós bele akontese mákina mate, maibé sempre iha ninia solusaun tanba bainhira sai pilotu, sempre hetan formasaun kompletu kona-bá ne’e.

Empreza Aero Dili mós kontrata instrutór na’in-rua hosi Korea Súl no Europa, Aero mossa ka pramugari inklui mekániku sira ne’ebé iha kualifikasaun di’ak ho esperiénsia servisu di’ak iha mundu aviasaun nian. 

Jornalista: Cipriano Colo