Hatutan.com, (22 Marsu 2023), Díli—Ezekusaun reál Orsamentu Jerál Estadu (OJE) 2023 ba Todo Governo – esklui kompromisu no obrigasaun sira, to’o iha Sesta-feira, 17 Marsu, em termos nominál ezekuta ona millaun $157 hosi orsamentu alokadu billiaun $2,16.
Osan Dolar Amérika. Foto/Google.
Ezekusaun aas liu maka iha Administrasaun Sentrál ne’ebé ezekuta ona millaun $155 hosi orsamentu alokadu billiaun $1,8. Tuir kedan ho Rejiaun Administrativa Espesiál Oecusse Ambeno (RAEOA) ne’ebé mak ezekuta ona millaun $2,1 hosi orsamentu alokadu millaun $84.
Lee Mós: Xefe Estadu Promulga OJE 2023 Billiaun $2,16
“Ezekusaun reál OJE 2023 ba Governu Sentrál em termos nominál atinji ona millaun $155 hosi totál orsamentu alokadu billiaun $1,8,” Hatutan.com sita komunikadu.
Ezekusaun aas liu maka iha Liñas Ministeriais ne’ebé ezekuta ona millaun $125 hosi orsamentu alokadu billiaun $1,2.
Tuir kedan ho Ajénsia Autónomas ho nia ezekusaun atinji ona millaun $17,4 hosi orsamentu alokadu millaun $218,3.
Autoridade Munisipais ezekuta ona millaun $9,5 hosi orsamentu alokadu millaun $81,3. Fundu Dezenvolvimentu Kapitál Umanu (FDCH, sigla Portugés) ezekuta ona millaun $1,5 hosi orsamentu alokadu millaun $17,8 no Fundu Infraestrutura (FI) ezekuta ona millaun $1,1 hosi orsamentu alokadu millaun $202,7.
To’o iha inísiu Fevereiru 2023, Ministériu Finansas halo ona levantamentu osan hosi Fundu Minarai ho montante millaun $300 hosi totál orsamentu billiaun $1,3 ne’ebé mak Parlamentu Nasionál aprova ona liuhosi Lei OJE 2023.
Lei OJE 2023 ne’e rasik hetan ona promulgasaun hosi Prezidente Repúblika, José Ramós-Horta iha fulan-Dezembru 2022.
Jornalista: Rogério Pereira Cárceres