Defeza & Seguransa
Ofisiál Superiór Na’in-Sia Nomeadu Hodi Lidera Departementu Sira Iha Komandu PNTL
Hatutan.com, (03 Abril 2023), Dili—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, nomeia Ofisiál Superiór na’in-sia (9), hodi lidera departementu sira mak instaladu iha Komandu PNTL.
Ofisiál Superiór sira ne’ebé Komandu PNTL Nomeia mak hanesan;
Lee Mós: Komissáriu Henrique da Costa-Pedro Belo Hakarak Hadi’a PNTL Ho Prioridade Lima
- Superintendente Xefe José Soares ba Komandante Operasaun Nasionál, hodi substitui Superintendente Xefe Polisia Pedro da Costa belo ho despaixu númeru 171/CG/PNTL/III/2023.
- Superintendente Xefe Polisia Arquimino Ramos ba Komandante Komandu Pessoál no Formasaun Komandu Jerál PNTL, substitui atuál Komisáriu Jerál PNTL Henrique da Costa. Nomeasaun ne’e, haktuir bá despaisu númeru 171/CG/PNTL/III/2023.
- Superintendente Polísia Julia da Gama ba kargu Komandante Unidade Apoia Servisu (UAS) Komandu Jerál PNTL, ho despaixu Komadante Jerál PNTL Komissáriu Jerál Polísia Henrique da Costa númeru 173/CG/PNTL/III/2023.
- Superintendente Emílio dos Santos bá Komandante Interinu Sentru Formasaun Polísia (CFP, sigla portugés), ho despaixu númeru 172/CG/PNTL/III/2023.
- Superintendente polísia Asistente polísia Helena das Dores Alves bá Xefe Departementu Saúde PNTL, ho Despaixu númeru 8/CG/PNTL/I/2023.
- Superientidente Asistente Carlito da Silva Adore bá kargu Xefe Departementu Relasaun Internasionál Komandu Jerál PNTL, ho despaixu númeru 17o /CG/PNTL/III/2023.
- Inspetór Xefe Polísia Ricardo Kurniwan Moniz Xefe Gabinete Komandante Jerál PNTL Komisariu Jerál PNTL, ho despaixu númeru 175 /CG/PNTL/III/2023.
- Inspetór Xefe Polísia José Lino ba kargu Xefe Gabinete Segundu Komandante PNTL, Komisariu Pedro Belo, ho depaixu númeru 172 /CG/PNTL/III/2023.
- Inspetór Polisia,Virgilio Correia ba kargu Xefe Departementu Gabinete Asesoria Juridiku Komandu Jerál PNTL, ho despaixu númeru 5/CG/PNTL/III/2023.
Hafoin serimonia nomeasaun no posse bá Ofisiál Superiór PNTL na’in-sia ne’e maka Komandante Jerál PNTL Komisáriu Jerál Polísia Henrique da Costa hateten, nomeasaun no serimónia fó pose bá Ofisiál Superiór sira ne’e atu priénxe estrutura Komandu PNTL ne’ebé mamuk hela.
“Ida ne’e hanesan prioridade lima ne’ebé hanesan iha ha’u nia diskursu hateten, oinsá atu halo jestaun internál instituisaun ninian, tanba ne’e mak ohin ita realiza pose ida-ne’e,” Henrique da Costa hateten hafoin seremónia nomeasaun iha Kuartél Jerál PNTL, Caicoli, Segunda (03/04/2023).
Komisáriu jerál Henrique da Costa dehan, Komandu Jerál PNTL mós fó prioridade bá asuntu igualidade jéneru, hodi fó oportunidade bá feto atu tuur iha posizaun.
Tanba ne’e maka Komandu PNTL nomeia no posse ba Superintendente Julia da Gama bá posizaun Xefe Departementu Unidade Apoia Servisu Komandu Jerál PNTL inklui Superintendente Asistente polísia Helena das Dores Alves bá Xefe Departementu Saúde PNTL.
Komandante Heriquie husu Ofisiál Superiór na’in-ualu seluk atu hala’o servisu tuir kompeténsia no funsaun ida-idak nian tuir funsaun ne’ebé defini ona hosi Lei Ogánika PNTL nian.
Komisáriu Jerál Henrique da Costa kompromete sei ajuda Superintendente Xefe Polisia José Soares, nu’udár komandante operasaun nasionál hodi halo servisu ho di’ak, tanba daudaun ne’e TL tama ona iha tinan politika, hodi hasoru atividade kampaña no eleisaun Parlamentár iha Domingu, 21 Maiu 2023.
Sei koordena ho Komandante Munisipiu sira inklui Servisu Informasaun Polísia (SIP) hodi identifika fatin sira ne’ebé risku ba konflitu hodi fó garantia seguransa iha eventu rua importante ne’e.
“Ita fó atensaun no fó orientasaun ba Komandante operasaun atu prepara efetivu sira, servisu hamutuk ho Servisu Informasaun Polísia nasionál to’o Komandu PNTL Munisipiu sira, atu iha tempu badak ne’e ita bele prepara planu operasaun no hahú servisu fó seguransa ba kampaña polítika,” Komandante Henrique fó hateten.
Komandante Operasaun Nasionál PNTL foun, Superintendente Xefe Polisia José Soares, promete atu servisu hamutuk ho Komandante Unidade Servisu Informasaun Polisia inklui Komandante Munisipiu sira atu hatuur planu operasaun bá kampaña iha eleisaun.
Komandante Operasaun Nasional ne’e husu sidadaun hotu atu apoia PNTL kria estabilidade durante kampaña no eleisaun Parlamentár, tanba seguransa la’ós PNTL mesak, maibé ema hotu tenke halo parte.
Tuir mandatu hosi Komandu Jerál PNTL katak, Ofisiál Superior na’in-sia ne’e sei lidera departementu sira ne’e durante tinan tolu.
Jornalista: Rogério Pereira Cárceres