PN Hakotu Mandatu Komisáriu Sérgio Hornai,  Atividade Importante CAC Paradu

Hatutan.com, (05 Abríl 2023), Díli— Parlamentu Nasionál liu-husi karta ofísiu nú 426/2023/V/PPN ne’ebé asina hosi Prezidente Parlamentu Nasionál, Aniceto Longuinhos Guterres Lopes iha Kuarta-Feira (05/04/2023) hakotu knaar Komisáriu Comissão Anti-Corrupção (CAC) Sérgio Hornai ba mandatu datoluk.

Senior Management Comissão Anti-Corrupção (CAC) kompostu husi Komisariu Sergio Hornai, Komisariu Adjuntu nain tolu; Alexandre Freitas, Augusto Castro, Luis Sampaio no estrutura Espesialista Anti-Korrupsaun (EAK) nian Segunda-feira (30/05/2022) hato’o Relatoriu Annual tinan 2021 iha Plenaria Uma Fukun Parlamento Nasional (PN). Foto/CAC.

Desizaun Parlamentu Nasionál ne’e hodi anula desizaun anteriór liu-hosi karta nú ofisiu 457/2023/V/PPN, 20 janeiru 2023, ne’ebé hanaruk mandatu Komisáriu CAC nian atu kontinua hala’o misaun CAC nian hodi hein eleisaun ba Komisáriu foun.

Lee Mós: Polémika Eleisaun Komissáriu CAC, PN Inisia Lei Kuórum no Espera Ramos-Horta Promulga

“Maibé, iha prosesu eleisaun komisáriu foun seidauk konklui, no iha tempu hanesan, iha dúvida lubuk ida hosi públiku no parte sira nakait kona-bá lejitimidade Komisáriu Mandatu datoluk nian, ho nune’e, PN deside hodi termina knaar Komisáriu CAC ba mandatu datoluk iha loron 05 fulan Abril tinan 2023,” Hatutan.com sita komunikadu.

Ho nune’e, hahú hosi loron 06 Abril 2023, CAC sei la iha ninia lideransa no atividade importante CAC nian hanesan prevensaun no investigasaun kriminál ba krime korrupsaun paradu. CAC bele funsiona fali normál bainhira hetan ona Komisáriu foun.

Terseiru Mandatu Komisáriu CAC Sérgio Hornai eleitu hosi PN iha loron 15 Janeiru 2019, ho votus 42 hosi deputadu sira 5a lejislatura no simu posse hosi PPN Arão Noé, iha loron 21 Janeiru 2021, iha Uma Fukun PN.

Durante hala’o mandatu, nomeia Komisáriu Adjuntu na’in-tolu maka; Augosto Castro no Alexandre Freitas hosi Espesialista Anti-Korrupsaun CAC nian, no Luis de Oliveira Sampaio hosi sosiedade sivíl hodi tulun nia hala’o misaun CAC nian tuir Lei haruka.

Jornalista: Rogério Pereira Cárceres