Hatutan.com, (27 Abríl 2023), Díli—Partidu União Democrática Timorense (UDT) lakohi atu nasaun ne’e depende de’it bá fundu petrolíferu, tanba ne’e bainhira hetan fiar iha eleisaun Parlamentár tinan 2023 hodi kaer ukun sei dezenvolve seitór haat ne’ebé bele hatama mós reseita ba Estadu.
Prezidente UDT, Francisco David Carlos esplika, área prioridade haat ne’ebé UDT sei dezenvolve bainhira kaer ukun mak hanesan infraestrutura, saúde, edukasaun no ekonómia.
Lee Mós: Kampaña Iha Seloi-Kraik, PDC Promete Hasa’e Folin Kafé
“Iha seitór ekonomia UDT sei halo diversifikasaun tanba setór ida-ne’e, iha mós ninia sub-seitór sira mak UDT haree katak iha poténsia tebes no iha produtividade ne’ebé tenke halakon dependénsia bá fundu petrolíferu. La’ós fundu petrolíferu de’it mak ita iha rikusoin, maibé hosi ekonomia hanesan agrikola, peska, pekuária ne’ebé essensiál tebtebes,” Francisco David Carlos hateten bá Hatutan.com via-telefonika, Kinta (27/04/2023).
Kona-bá seitór edukasaun, UDT haree katak nasaun ida-ne’e ninia dependénsia la’ós bá fundu petrolíferu de’it, maibé tenke rekursu umanu ne’e rasik mós importante.
“Rekursu umanu en-sí ne’e importante. Ne’e hakarak investe maka’as iha área edukasaun,” Francisco David Carlos promete.
La’ós ne’e de’it, UDT mós iha tan programa ida mak ko’alia kona-bá indústria bá família. Dala-ruma TL iha dependénsia bá produtu alimentár sira mai hosi rai-liur, hanesan super mie ho seluk tán.
Atuál deputadu UDT ne’e haktuir, hahú kedan tinan lubuk ida bá kotuk, UDT ho ninia apoiante real hamutuk 5.000.
Bainhira iha 2007, nia assume responsábilidade nu’udár Sekretáriu Jerál partidu, ho Prezidente Gilman dos Santos Exposto (matebian), nia rasik konsege atinje to’o 12.250.
Ikus mai, ho estratéjia polítika foun ne’ebé halo, UDT involve iha koligasaun Frente Dezenvolvimentu Demokrátika (FDD) no ohin konsege hetan asentu Parlamentár iha Uma-fukun.
Tama ona bá semana ida resin, durante kampaña eleitorál hale’u munisipiu, UDT sempre hala’o nia komísiu iha fatin ne’ebé mak destinada hanesan iha Munisipiu Ermera, ho Postu Administrativu Maubisse, Munisipiu Ainaro. Tuir kalendáriu, UDT sei konklui nia komísiu iha kapitál Munisipiu Dili.
Jornalista: Rogério Pereira Cárceres
