Kampaña PVT Iha Liquiça, PNTL Prende Motór Haat Uza Kanu Resin

Hatutan.com, (28 Abríl 2023), Díli—Polísia Nasionál Timor-Leste (PNTL), Komandu Munisipiu Likisá, prende motorizada haat (4) tanba uza kanu resin no la uza xapa matrikula, durante komísiu partidu Os Verdes de Timor (PVT).

Kampaña Partidu Os Verdes de Timor (PVT) iha kampu Futeból Likisá Villa, Kinta (27/04/2023).Foto/PVT.

Evidénsia motorizada hirak ne’e PNTL prende bainhira militante, apoiante no simpatizante sira hala’o konvoi atu partisipa iha kampaña PVT nian iha kampu Futeból Likisá Villa, hosi tuku 08:00 to’o 18:30 Otl, Kinta (27/04/2023).

Lee Mós: Partidu Os Verdes Timor Kompromete Kampu Servisu iha Rai-Li’ur bá Joven Sira

Iha dalan, membru PNTL sira fó hela seguransa no halo mós passa revista bá motorizada sira ne’e. Ikus mai konsege prende motirizada haat hosi militante sira.

“Horseik iha postu administrativu Likisá Villa, iha partidu balun hala’o sira-nia kampaña iha ne’ebá, sira-nia militantes balun la’o ho motór kanu-resin, no mós balun la uza kapasete. Tanba ne’e, mak ita konsege prende ona motor haat,” Portavós Komandu Jerál PNTL, Superintendente Xefe Polísia Arnaldo de Araújo hateten liuhosi konferénsia imprénsa iha Kuartél Jerál Caicoli, Sesta (28/04/2023).

Hafoin prende, PNTL entrega kedan nota infrasaun bá infratór sira atu lori bá selu iha banku ne’ebé besik, hafoin foti fila-fali sira-ninina motorizada.

“Oras-ne’e daudaun motor sira ne’e iha ona polisia nia liman. Fó kedan sansaun bá sira, aplika multa bá sira, nune’e sira bele bá selu iha banku hodi bele foti fali. Ita hein katak, sira bele bá selu uluk iha banku, atu foti fila sira-nia motór,” Komandante Arnaldo hateten.

Maski nune’e, PNTL garante katak, situasaun en-jerál iha territóriu tomak durante kampaña la akontese bá buat ne’ebé maka afeta bá estabilidade rai-laran.

Jornalista: Rogério Pereira Cárceres