Programa PLP, Família Dezempregu Nia Oan Ida Eskola Gratuita Hosi Pré-Eskolár To’o Universidade

Hatuta.com, (30 Abríl 2023), Aileu—Partidu Libertasaun Populár (PLP) promete bá povu Aileu katak, bainhira fila bá ukun iha tinan lima mai, sei implementa programa ida maka selu kada família nia oan ida atu eskola hosi Pré-Eskolár to’o Universidade.

Partidu Libertasaun Populár (PLP) hala’o kampaña iha kampu futeból Munisípiu Aileu, Domingu (30/04/2023). Foto/Elio dos Santos da Costa.

Programa ne’e hato’o direta hosi Prezidente PLP, Taur Matan Ruak iha kampaña ne’ebé hala’o iha kampu futeból Munisípiu Aileu, Domingu (30/04/2023).

Lee Mós: PLP Ukun Hakarak Diversifika Ekonomia

“Karik hetan konfiansa bá ukun, sei implementa programa selu kada família nia oan ida bá eskola, hahú hosi Pré-Eskolár to’o Univesdade hodi  hakmán família kbi’it laek sira atu selu sira nia oan nia eskola,”  Taur Matan Ruak hateten.

Programa ida-ne’e sei fó prioridade liu bá família sira ne’ebé dezempregu no hirak ne’ebé servisu maibé simu saláriu báziku.

“Feto ran, mane klosan ne’ebé hola malu, nia oan primeiru, Governu mak tau-matan ba nia eskola hahú hosi TK to’o S1, Estadu mak selu. Maibé inan aman tenke kuda hali ida, depois tau labarik nia naran, labarik boot hali mós boot. Tanba saída mak ita hakarak ajuda, tanba ita hakarak ita-nia oan sira tenke matenek, programa ne’e nia alvu maka sira ne’ebé la servisu no sira ne’ebé serbisu maibé simu saláriu baziku, Estadu ajuda nia,” Taur Matan Ruak esplika.

Númeru eleitór iha Munisipiu Aileu ne’ebé mak Sekretariadu Tékniku Administrasaun Eleitorál (STAE) rejistu atu partisipa iha eleisaun Parlamentár maka, Postu Administravu Aileu-vila, 17.305, mane 9047 no feto 8258, Postu Administravu Laulara 4.640, mane 2.405 no feto 2.235, Postu Administravu Liquidoe 4.885, mane 2.878 no feto 2.007, Postu Administravu Remexio 8.132, mane 4.331 no feto 3.801.

Total eleitór iha Munisípiu Aileu 34.962, mane 18.661 ho 53% no feto 16.301 ho 47%.

Kampaiña PLP iha kampu futeból Munisípiu Aileu ne’e, hetan supervizaun hosi Comissão Nasional Eleições (CNE), Provedoria Direitos Humanos no Justiça (PDHJ), hetan seguransa hosi Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL).

Jornalista: Elio dos Santos da Costa